പത്തനംതിട്ട: ഇന്നലെയും ശബരിമലയില് വന്ഭക്തജന തിരക്ക്. ഇന്നലെ 75,000 പേര് ദര്ശനത്തിനെത്തിയെന്ന് പൊലീസ് അറിയിച്ചു. ഇന്നലെ 75000 പേര് രാത്രിവരെയുള്ള കണക്കുകള് അനുസരിച്ച് ദര്ശനം നടത്തിയതായാണ് വിവരം. മിനുറ്റില് 80 തീര്ഥാടകരാണ് ദര്ശനം നടത്തുന്നതെന്ന് അധികൃതര് അറിയിച്ചു. അതേസമയം ഇന്നലെ 7000 കുട്ടികള് ദര്ശനം നടത്തി. 45 പോലീസുകാരെയാണ് പതിനെട്ടാംപടിയില് ഭക്തരെ പടി ചവിട്ടാന് സഹായിക്കുന്നതിനായി നിയോഗിച്ചിട്ടുള്ളത്. ഓരോ 15 മിനിറ്റിലും ഇവരെ മാറ്റിക്കൊണ്ടിരിക്കും.
സന്നിധാനത്ത് നട തുറന്ന് നാല് ദിവസത്തിനുള്ളില് ശബരിമലയില് എത്തിയത് ലക്ഷക്കണക്കിന് അയ്യപ്പ ഭക്തരാണെന്നാണ് കണക്കുകള്. ഇന്നലെ വരെയുള്ള വിവരങ്ങള് പ്രകാരം 2.26 ലക്ഷം അയ്യപ്പ ഭക്തരാണ് സന്നിധാനത്ത് അയ്യനെ കണ്ട് വണങ്ങാനെത്തിയത്. ഇന്നലെ മാത്രം ദര്ശനം നടത്തിയത് 73000 ഭക്തരെന്നും കണക്കുകള്. രാത്രിവരെയുള്ള കണക്കുകള് അനുസരിച്ചാണിത്. പുലര്ച്ചെ 3ന് നട തുറക്കുമ്പോള് മിനിറ്റില് 80 പേരെ വീതം പതിനെട്ടാംപടി കയറ്റുന്നുണ്ട് . സോപാനത്തിനു മുന്പിലെത്തി തൊഴുതശേഷം മുന്നോട്ടു നീങ്ങുന്ന ഭക്തരുടെ ഒഴുക്കിനെ തടസ്സപ്പെടുത്തുന്ന രീതിയില് എതിര് ദിശയിലെത്തി ആരെയും ദര്ശനത്തിനനുവദിക്കില്ല.
വി.ഐ.പി.കള് അടക്കമുള്ളവരെ ശ്രീകോവിലിന്റെ പിന്നിലെ മുറ്റം വഴി എത്തിച്ച് ഭക്തരുടെ നിരയ്ക്ക് സമാന്തരമായി മാത്രമേ ദര്ശന സൗകര്യമൊരുക്കുകയുള്ളൂ. വൃശ്ചികം 12നു ശേഷം തിരക്കു വര്ധിക്കുമെന്നാണു ദേവസ്വം ബോര്ഡിന്റെ കണക്കുകൂട്ടല്. തീര്ഥാടകരുടെ യാത്രയ്ക്കായി കെഎസ്ആര്ടിസി പമ്പയില് 383 ബസുകള് എത്തിച്ചു.തീര്ഥാടന വഴികളില് പോക്കറ്റടിപോലുള്ള കുറ്റകൃത്യങ്ങള് തടയാന് പ്രത്യേക അനുഭവ പരിചയമുള്ള പൊലീസ് സ്ക്വാഡിനെ നിയോഗിച്ചതായി ശബരിമല സന്നിധാനം പൊലീസ് സ്പെഷ്യല് ഓഫീസര് കെ.ഇ.ബൈജൂ അറിയിച്ചു. അയല് സംസ്ഥാനങ്ങളില് നിന്നും പ്രവര്ത്തിച്ച് അനുഭവ പരിചയമുള്ള പൊലീസ് ഉദ്യോഗസ്ഥരടങ്ങിയ ടീമിനെയാണ് ഇതിനായി നിയോഗിച്ചിട്ടുള്ളത്.
