കൊച്ചി: ക്ഷേത്രങ്ങളില് ഗുണനിലവാരമില്ലാത്തതും മായം കലര്ന്നതുമായ പൂജാദ്രവ്യങ്ങള് ഒരു കാരണവശാലും ഉപയോഗിക്കരുതെന്ന് അഖില കേരള തന്ത്രി സമാജം ആവശ്യപ്പെട്ടു.
മൃഗ കൊഴുപ്പടങ്ങിയ എണ്ണ, നെയ്യ്, നിലവാരമില്ലാത്ത ശര്ക്കര എന്നിവ ക്ഷേത്രത്തില് ഉപയോഗിക്കാതിരിക്കാനുള്ള നടപടികള് സ്വീകരിക്കാന് ഇതിനായി ദേവസ്വം വകുപ്പില് നിര്ബന്ധമായും ക്വാളിറ്റി കണ്ട്രോള് സെല് തുടങ്ങണമെന്നും അങ്കമാലിയില് ചേര്ന്ന തന്ത്രിസമാജം വാര്ഷിക സമ്മേളനം ആവശ്യപ്പെട്ടു. സര്ക്കാര് അംഗീകൃത ഗുണനിലവാര മുദ്രണമുള്ള പൂജാദ്രവ്യങ്ങള് മാത്രമേ ഉപയോഗിക്കൂനുള്ളൂ എന്ന് ഉറപ്പ് വരുത്തണം. ഇക്കാര്യങ്ങള് ഏറെക്കാലമായി അഖില കേരള തന്ത്രി സമാജം വിവിധ ദേവസ്വം ബോര്ഡുകളോട് ആവശ്യപ്പെട്ടുവരുന്ന കാര്യങ്ങളാണ്. അന്യസംസ്ഥാനങ്ങളില് നിന്ന് വരുന്ന പൂജാപുഷ്പങ്ങള്ക്കു പകരം ഓരോ ക്ഷേത്രങ്ങളിലും പൂജാപുഷ്പ തോട്ടങ്ങള് ഉണ്ടാക്കുവാനും, സംരക്ഷിക്കുവാനും അധികൃതര് തയാറാകണമെന്നും സമ്മേളനം നിര്ദേശിച്ചു.
അങ്കമാലിയില് കേന്ദ്ര ആസ്ഥാനത്ത് എ.എ.ഭട്ടതിരിപ്പാടിന്റെ അധ്യക്ഷതയില് കേന്ദ്രകമ്മറ്റി യോഗം ചേര്ന്ന് പുലിയന്നൂര് ശശി നമ്പൂതിരിപ്പാട് (പ്രസിഡന്റ്), എ.എ. ഭട്ടതിരിപ്പാട് (വൈസ് പ്രസിഡന്റ്), പുടയൂര് ജയനാരായണന് നമ്പൂതിരിപ്പാട് (ജനറല് സെക്രട്ടറി), സൂര്യകാലടി പരമേശ്വരന് ഭട്ടതിരിപ്പാട് (ജോയിന്റ് സെക്രട്ടറി), ഇടക്കഴിപ്പുറം രമേശന് നമ്പൂതിരി- (ട്രഷറര്) എന്നിവരെ ഭാരവാഹികളായി തെരഞ്ഞെടുത്തു.
