മലപ്പുറം: പ്രണയം നടിച്ച് യുവതിയുടെ നഗ്ന ചിത്രങ്ങള്‍ പകര്‍ത്തി പ്രചരിപ്പിച്ച കേസില്‍ ഇരട്ട സഹോദരങ്ങള്‍ പിടിയില്‍. യുവതിയോട് പ്രണയം നടിച്ച് സഹോദരങ്ങള്‍ വീഡിയോ കോള്‍ വഴിയാണ് നഗ്ന ചിത്രങ്ങള്‍ പകര്‍ത്തിയത്.
കാളികാവ് അഞ്ചച്ചവടി കാണാഞ്ചേരി ഹസൈനാര്‍ (21), ഹുസൈന്‍ (21) എന്നിവരെയാണ് പൊലീസ് അറസ്റ്റ് ചെയ്തത്. നിലമ്പൂര്‍ ചന്തക്കുന്നില്‍ വാടകയ്‌ക്ക് താമസിക്കുന്നതിനിടെയാണ് സഹോദരങ്ങള്‍ യുവതിയെ പരിചയപ്പെടുന്നത്. ഹസൈനാരാണ് ആദ്യം പ്രണയം നടിച്ച് യുവതിയെ വലയിലാക്കിയത്. തുടര്‍ന്ന് സഹോദരങ്ങള്‍ വയനാട് ചുള്ളിയോട്ടിലേക്ക് താമസം മാറി.
ഹുസൈനും യുവതിയോട് മൊബൈല്‍ ഫോണ്‍ വഴി പ്രണയാഭ്യര്‍ത്ഥന നടത്തിയെന്ന് പൊലീസ് കണ്ടെത്തി.യുവതിയെ പ്രലോഭിപ്പിച്ച് രാത്രിയിലാണ് വസ്ത്രമില്ലാതെയുളള ദൃശ്യങ്ങള്‍ പകര്‍ത്തിയത്.
ഇതിന് ശേഷം യുവതിയുമായി സഹോദരങ്ങള്‍ തെറ്റി. സുഹൃത്തുക്കള്‍ക്കും വീട്ടുകാര്‍ക്കും വീഡിയോ അയച്ചുകൊടുക്കുമെന്നു പറഞ്ഞ് ഭീഷണിപ്പെടുത്തിയതോടെ യുവതി ബന്ധത്തില്‍ നിന്ന് പിന്‍മാറി. ഇതോടെ ഇരുവരും യുവതിയുടെ നഗ്ന ദൃശ്യം പ്രചരിപ്പിച്ചു. പ്രതികളെ മഞ്ചേരി കോടതി റിമാന്‍ഡ് ചെയ്തു.
