ചെന്നൈ: തമിഴ് സൂപ്പര്‍താരം ഇളയ ദളപതി വിജയിന്റെ രാഷ്‌ട്രീയ കക്ഷിയായ തമിഴക വെട്രി കഴകത്തിന്റെ (ടിവികെ) ആദ്യ സംസ്ഥാന സമ്മേളനത്തിനു തുടക്കം. വൈകിട്ട് നാല് മണിയോടെ വേദിയിലെത്തിയ താരം പ്രവര്‍ത്തകരെ അഭിസംബോധന ചെയ്തു.
വേദിയില്‍ പ്രത്യേകം സജ്ജമാക്കിയ റാംപിലൂടെ നടന്നുനീങ്ങിയ വിജയ് ആരാധക സമുദ്രത്തെ അഭിവാദ്യം ചെയ്തു. പാര്‍ട്ടിയുടെ ഗാനവും വേദിയില്‍ അവതരിപ്പിച്ചു. 100 അടി ഉയരമുള്ള കൊടിമരത്തില്‍ ചുവപ്പും മഞ്ഞയും കലര്‍ന്ന പാര്‍ട്ടി പതാകയും താരം ഉയര്‍ത്തി.
തിരക്കില്‍ നിര്‍ജലീകരണത്തെ തുടര്‍ന്ന് നൂറിലേറെ പേര്‍ കുഴഞ്ഞുവീണു. സമ്മേളന സ്ഥലത്ത് 35ലധികം ഡോക്ടര്‍മാരെ നിയോഗിച്ചിട്ടുണ്ട്. വൈകിട്ടാണ് സമ്മേളനം ആരംഭിക്കാന്‍ നിശ്ചയിച്ചതെങ്കിലും നേരത്തെ തന്നെ വേദിയില്‍ കലാപരിപാടികള്‍ ഉള്‍പ്പെടെ ആരംഭിച്ചിരുന്നു.
വിഴുപ്പുറം ജില്ലയിലെ വിക്രവാണ്ടിയില്‍ 85 ഏക്കറില്‍ തയാറാക്കിയ പ്രത്യേക വേദിയിലാണ് സമ്മേളനം.പാര്‍ട്ടിയുടെ പ്രത്യയശാസ്ത്രവും നയങ്ങളും വിജയ് അവതരിപ്പിക്കും. 19 പ്രമേയങ്ങളായിരിക്കും സമ്മേളനത്തില്‍ അവതരിപ്പിക്കുക. ഫെബ്രുവരിയില്‍ രാഷ്‌ട്രീയ പ്രവേശനം പ്രഖ്യാപിച്ച വിജയ് ഓഗസ്റ്റിലാണ് പാര്‍ട്ടി പാതകയും ഗാനവും അവതരിപ്പിച്ചത്. ടിവികെയെ രജിസ്‌റ്റേര്‍ഡ് രാഷ്‌ട്രീയ പാര്‍ട്ടി ആയി തെരഞ്ഞെടുപ്പ് കമ്മീഷന്‍ അംഗീകരിച്ചിട്ടുണ്ട്.
ഉപമുഖ്യമന്ത്രി ഉദയനിധി സ്റ്റാലിന്‍, നടന്മാരായ സൂര്യ,ജയംരവി തുടങ്ങി നിരവധി പേര്‍ വിജയിന് ആശംസ നേര്‍ന്നു.
