കണ്ണൂര്: പെട്രോള് പമ്പിന് അനുമതി നല്കാന് എഡിഎം കെ നവീന് ബാബു കൈക്കൂലി വാങ്ങിയെന്ന് ആരോപണം ഉന്നയിച്ച ടിവി പ്രശാന്തനെ ആരോഗ്യവകുപ്പ് സസ്പെന്ഡ് ചെയ്തു. പരിയാരം മെഡിക്കല് കോളേജിലെ ഇലക്ട്രിക്കല് വിഭാഗം താത്കാലിക ജീവനക്കാരനാണ് പ്രശാന്ത്.
നവീന് ബാബുവിന്റെ മരണ ശേഷം ഇന്നാണ് പ്രശാന്തന് ജോലിക്കെത്തിയത്. ഇതോടെയാണ് വകുപ്പിന്റെ പെട്ടെന്നുള്ള നടപടി.
സര്ക്കാര് ജീവനക്കാരനായിരിക്കെ ഇയാള് സ്വകാര്യ ബിസിനസ് സംരംഭത്തില് ഏര്പ്പെട്ടത് ഗുരുതര അച്ചടക്ക ലംഘനവും പെരുമാറ്റച്ചട്ട ലംഘനവുമാണെന്ന് ഉത്തരവില് ചൂണ്ടിക്കാട്ടിയിട്ടുണ്ട്. 2019ല് സര്ക്കാര് പരിയാരം ആശുപത്രി ഏറ്റെടുക്കുന്ന ഘട്ടം മുതല് സ്ഥിരപ്പെടുത്തുന്ന ജീവനക്കാരുടെ പട്ടികയില് ടിവി പ്രശാന്തന് ഉള്പ്പെട്ടിരുന്നു.ആ സമയത്താണ് എഡിഎമ്മുമായി ബന്ധപ്പെട്ട കേസ് ഉയര്ന്നു വന്നത്.
ഈ മാസം പത്ത് മുതല് ഇയാള് ആശുപത്രിയിലെ സേവനത്തില് നിന്നും വിട്ടുനിന്നതായി കണ്ടെത്തിയിട്ടുണ്ട്. കൈക്കൂലി നല്കിയെന്ന് പരസ്യമായി പ്രഖ്യാപിച്ചതും ഇയാള്ക്കെതിരെ കടുത്ത നടപടിക്ക് അന്വേഷണസംഘം ശുപാര്ശ ചെയ്യാന് കാരണമായി.
അഡീഷണല് ചീഫ് സെക്രട്ടറി രാജന് എന് ഖോബ്രഗഡെയുടെ നേതൃത്വത്തിലായിരുന്നു ആരോഗ്യവകുപ്പിന്റെ അന്വേഷണം നടന്നത്.
