തിരുവനന്തപുരം: ചിറയിന്കീഴില് ഇക്കഴിഞ്ഞ ഒക്ടോബര് 17ന് മരിച്ച നിലയില് കണ്ടെത്തിയ നിര്മ്മല(75)യുടെ മരണം കൊലപാതകമെന്ന് തെളിഞ്ഞു.വൃദ്ധയുടെ കൊലപാതകത്തില് മകളും ചെറുമകളും അറസ്റ്റിലായി.
അഴൂര് റെയില്വേ ഗേറ്റിന് സമീപം നിര്മ്മലയുടെ മൂത്ത മകള് ശിഖ (55), ശിഖയുടെ മകള് ഉത്തര (34) എന്നിവരാണ് അറസ്റ്റിലായത്.
കൊല്ലപ്പെട്ട നിര്മ്മലയ്ക്ക് ശിഖ ഉള്പ്പെടെ മൂന്ന് മക്കളുണ്ട്. ഒരു മകള് അമേരിക്കയിലാണ്. മറ്റൊരു മകള് കവടിയാറിലും. ഇവരൊക്കെ നല്ല സാമ്പത്തിക സ്ഥിതിയില് കഴിഞ്ഞു വരുന്നു. നിര്മ്മലയുടെ പേരിലുള്ള സ്ഥിര നിക്ഷേപം ചിറയിന്കീഴ് സഹകരണ ബാങ്കിലാണ്. അവകാശിയായി മൂത്തമകള് ശിഖയെ വയ്ക്കാത്തതിലും നിര്മ്മലയുടെ സ്വത്തുക്കളും സമ്പാദ്യവും നല്കാത്തതിലുമുള്ള വൈരാഗ്യമാണ് സാമ്പത്തികമായി പിന്നോക്കം നില്ക്കുന്ന ശിഖയെയും മകളെയും കൊലപാതകത്തിന് പ്രേരിപ്പിച്ചതെന്ന് പൊലീസ് പറഞ്ഞു. ഒക്ടോബര് 14ന് വൈകുന്നേരം നിര്മ്മലയുടെ ഷെഡ്ഡിന്റെ താക്കോല് കാണാത്തതില് നിര്മ്മല ശിഖയോടും ഉത്തരയോടും വഴക്കിട്ടിരുന്നു. തുടര്ന്ന് വള്ളി ഉപയോഗിച്ച് നിര്മ്മലയുടെ കഴുത്തില് ചുറ്റിവരിഞ്ഞ് കൊലപ്പെടുത്തി.
നാട്ടുകാരുമായി വലിയ അടുപ്പം കാണിക്കാത്ത പ്രതികള് ബന്ധുക്കളോട് നിര്മ്മലയ്ക്ക് സുഖമില്ല എന്ന വിവരം ഒക്ടോബര് 17നാണ് പറഞ്ഞത്.അപ്പോഴേക്കും നിര്മ്മലയുടെ ശരീരം അഴുകിയിരുന്നു. നിര്മ്മല മരിച്ചു കിടക്കുന്ന സമയത്തും ശിഖയും മകളും നിര്മ്മലയുടെ പേരിലുള്ള നിക്ഷേപം അവരുടെ പേരില് ആക്കാന് ശ്രമം നടത്തിയിരുന്നു.
പൊലീസ് വിശദമായി ശിഖയെയും ഉത്തരയെയും ചോദ്യം ചെയ്ത ശേഷമാണ് പ്രതികള് ഇവരാണെന്ന് തിരിച്ചറിഞ്ഞത്. അറസ്റ്റ് ചെയ്ത പ്രതികളെ കോടതിയില് ഹാജരാക്കി റിമാന്ഡ് ചെയ്തു.
