തിരുവനന്തപുരം: കെഎസ്ആര്‍ടിസി എസി സൂപ്പര്‍ഫാസ്റ്റ് പ്രീമിയം സര്‍വീസ് യാത്രയ്‌ക്ക് തയാറായി. സര്‍വീസുകള്‍ അടുത്ത ആഴ്ച ഉദ്ഘാടനം ചെയ്യും.അത്യാധുനിക സൗകര്യങ്ങളാണ് ബസിലുളളത്.
ആദ്യഘട്ടത്തില്‍ 10 ബസുകള്‍ സര്‍വീസ് നടത്തും.സൂപ്പര്‍ഫാസ്റ്റിനും എക്‌സ്പ്രസിനും ഇടയിലാകും ടിക്കറ്റ് നിരക്ക്. വൈഫൈ കണക്ഷന്‍, മ്യൂസിക് സിസ്റ്റം, പുഷ് ബാക്ക് സീറ്റ് എന്നീ സൗകര്യങ്ങള്‍ ബസിലുണ്ട്. 40 സീറ്റുകള്‍ ബസില്‍ ഉണ്ടാകും.
ടിക്കറ്റ് മുന്‍കൂട്ടി ബുക്ക് ചെയ്യാം. ഇടയ്‌ക്ക് യാത്രക്കാര്‍ക്ക് ഭക്ഷണത്തിനായി ഗുണനിലവാരമുള്ള ഹോട്ടലുകളില്‍ സൗകര്യം ഒരുക്കും. തിരുവനന്തപുരം- കോഴിക്കോട്, കോഴിക്കോട് – തിരുവനന്തപുരം, തിരുവനന്തപുരം – പാലക്കാട്, പാലക്കാട് – തൃശൂര്‍ റൂട്ടുകളിലാണ് എസി സൂപ്പര്‍ഫാസ്റ്റ് പ്രീമിയം സര്‍വീസ് പരിഗണിക്കുന്നത്.
ദേശീയപാത നിര്‍മാണം നടക്കുന്നതിനാല്‍ തുടക്കത്തില്‍ എംസി റോഡിനാണ് മുന്‍ഗണന നല്‍കുന്നത്. കുറഞ്ഞ ചെലവില്‍ സൗകര്യപ്രദമായ യാത്രയാണ് എസി സൂപ്പര്‍ഫാസ്റ്റ് പ്രീമിയം സര്‍വീസിലൂടെ കെഎസ്ആര്‍ടിസി ലക്ഷ്യമിടുന്നത്.
