മക്കാവു: ഭാരത പുരുഷ സിംഗിള്സ്താരം കിഡംബി ശ്രീകാന്തിന് മക്കാവു ഓപ്പണ് ബാഡ്മിന്റണില് ആദ്യ മത്സരത്തില് വിജയം. ഇസ്രായേലിന്റെ ഡാനില് ദുബോവെങ്കോയെ നേരിട്ടുള്ള സെറ്റുകള്ക്ക് തോല്പ്പിച്ചു. സ്കോര്: 21-14, 21-15.
മിക്സഡ് ഡബിള്സില് നടന്ന റൗണ്ട് ഓഫ് 32 മത്സരത്തില് ഭാരത സഖ്യം സുമീത് റെഡ്ഡിയും സിക്കി റെഡ്ഡിയും ചേര്ന്ന് മലേഷ്യന് താരങ്ങളായ ലൂ ബിംഗ് കുന്-ഹോ ലോ ഇീ സഖ്യത്തെ പരാജയപ്പെടുത്തി. സ്കോര്: 24-22, 10-21, 21-13. അതേസമയം റോഹന് കപൂര്-റുത്വിക ശിവാനി സഖ്യം നല്ലപോരാട്ടം കാഴ്ച്ചവച്ചെങ്കിലും റുട്ടനപാക് ഔപ്തോങ്-ജെനീസ സുദ്ജയിപ്രപാററ്റ് സഖ്യത്തോട് തോറ്റ് പുറത്തായി. വനിതാ സിംഗിള്സില് ഭാരതത്തിന്റെ തന്യ ഹേമന്തും ലിയാങ് ടിങ് യുവിനോട് പരാജയപ്പെട്ടു. അനുപമ ഉപാധ്യായ റിക്കോ ഗുഞ്ജിക്ക് മുന്നിലും കീഴടങ്ങി. ഇഷാറാണി ബറുവ ചൈനയുടെ വു ലുവോ യു വിനോട് പരാജയപ്പെട്ടു.
പുരുഷ സിംഗിള്സില് ഇറങ്ങിയ മറ്റൊരു ഭാരത താരം മിഥുന് മഞ്ജുനാഥ് റൗണ്ട് ഓഫ് 32ല് തോറ്റുമടങ്ങി. ഹുവാങ് യു കായി ആണ് മിഥുനെ തോല്പ്പിച്ചത്.
