ന്യൂദല്ഹി: രാജ്യം രാഷ്ട്രീയ സ്ഥിരതയ്ക്കും നട്ടെല്ലുള്ള വിദേശ നയത്തിനും സാക്ഷ്യം വഹിക്കുകയാണെന്ന് ആഭ്യന്തരമന്ത്രി അമിത് ഷാ. ആദ്യത്തെ 10 വര്ഷം ജനങ്ങളുടെ ക്ഷേമത്തിനും വികസനത്തിനും സുരക്ഷയ്ക്കും പ്രാധാന്യം നല്കിയതിന്റെ ഫലമായാണ് മൂന്നാം തവണയും അധികാരത്തിലേറാന് ബിജെപിയ്ക്കും സഖ്യകക്ഷികള്ക്കും സാധിച്ചതെന്ന് അമിത് ഷാ പറഞ്ഞു. മൂന്നാം മോദി സര്ക്കാരിന്റെ ആദ്യ നൂറു ദിവസത്തെ റിപ്പോര്ട്ട് കാര്ഡ് പുറത്തിറക്കി സംസാരിക്കുകയായിരുന്നു അദ്ദേഹം.
രാജ്യത്തുടനീളമുള്ള പ്രധാന റോഡുകള് 50,600 കോടി രൂപ ചെലവില് വികസിപ്പിക്കാന് കേന്ദ്രം തീരുമാനിച്ചു. 49,000 കോടി രൂപ ചെലവില് 25,000 ഗ്രാമങ്ങളെ റോഡ് ശൃംഖലയുമായി ബന്ധിപ്പിക്കുന്നതാണ് ഇതിലെ പ്രധാന പദ്ധതി. രാജ്യത്തുടനീളമുള്ള പ്രധാന റോഡുകളുടെ വികസനം, തുറമുഖ നിര്മാണം, യുവാക്കള്ക്കായി പാക്കേജ്, മെട്രോ, വിമാനത്താവളങ്ങള്, എയര്-മെട്രോ കണക്റ്റിവിറ്റി, വീടുകളുടെ നിര്മാണം, കിസാന് സമ്മാന് യോജന തുടങ്ങി സമഗ്രമായ റിപ്പോര്ട്ട് കാര്ഡാണ് ബിജെപി പുറത്തിറക്കിയിരിക്കുന്നത്.
76,000 കോടി രൂപ ചെലവില് മഹാരാഷ്ട്രയിലെ വാധ്വാനില് ഒരു മെഗാ തുറമുഖം നിര്മിക്കും. ഈ തുറമുഖത്തെ ലോകത്തിലെ തന്നെ ഏറ്റവും മികച്ച 10 തുറമുഖങ്ങളില് ഒന്നായി മാറ്റും. സൈബര് കുറ്റകൃത്യങ്ങള് നേരിടാന് അടുത്ത അഞ്ച് വര്ഷത്തിനുള്ളില് 5,000 സൈബര് കമാന്ഡോകളെ വിന്യസിക്കും, യുവാക്കള്ക്കായി പ്രധാനമന്ത്രി പ്രഖ്യാപിച്ച രണ്ട് ലക്ഷം കോടി രൂപയുടെ പാക്കേജിലൂടെ അഞ്ച് വര്ഷത്തിനുള്ളില് 4.10 കോടി യുവാക്കള്ക്ക് പ്രയോജനം ലഭിക്കുമെന്നും അമിത് ഷാ പറഞ്ഞു.
കാര്ഷിക മേഖലയില് പ്രധാനമന്ത്രി കിസാന് സമ്മാന് യോജനയുടെ 17ാം ഗഡുവായി 9.5 കോടി കര്ഷകര്ക്ക് സര്ക്കാര് 20,000 കോടി രൂപ വിതരണം ചെയ്തതായി അമിത് ഷാ വ്യക്തമാക്കി. ടൂറിസം പ്രോത്സാഹിപ്പിക്കുന്നതിനായി വാരണാസിയിലെ ലാല് ബഹദൂര് ശാസ്ത്രി അന്താരാഷ്ട്ര വിമാനത്താവളം, പശ്ചിമ ബംഗാളിലെ ബാഗ്ഡോഗ്ര വിമാനത്താവളം, ബിഹാറിലെ ബിഹ്ത വിമാനത്താവളം എന്നിവ നവീകരിക്കും. ബെംഗളൂരു മെട്രോ, പൂനെ മെട്രോ, താനെ ഇന്റഗ്രേറ്റഡ് റിങ് മെട്രോ എന്നീ പദ്ധതികള് ഏറ്റെടുത്തെന്നും 2024 ജൂണ് മുതല് ആഗസ്ത് വരെ 2.5 ലക്ഷം വീടുകളില് സൗരോര്ജ്ജ സംവിധാനങ്ങള് സ്ഥാപിക്കാന് സഹായം നല്കി. മണിപ്പൂരില് ശാശ്വത സമാധാനത്തിനായി കേന്ദ്ര സര്ക്കാര് ഇരുവിഭാഗങ്ങളുമായി ചര്ച്ചയിലാണെന്നും അമിത് ഷാ വ്യക്തമാക്കി.
