ആലപ്പുഴ: കേരള ബാങ്കില് നിന്നും ജപ്തി ഭീഷണി നേരിട്ട പെരുമ്പളം സ്വദേശികളുടെ വീടിന്റെ ആധാരം കൈമാറി കേന്ദ്രമന്ത്രി സുരേഷ് ഗോപി. പെരുമ്പളത്തെ രാജപ്പന്റെ കുടുംബത്തിന് താങ്ങായാണ് സുരേഷ് ഗോപിയുടെ ഇടപെടല്.
കുടുംബത്തിലെ മൂന്ന് പേരും ക്യാന്സര് ബാധിതരാണ്. മത്സ്യ ബന്ധന തൊഴിലിലാളിയായ രാജപ്പന്റെ വരുമാനം കൊണ്ട് കുടുബത്തിന് മുന്നോട് പോകാന് കഴിയാത്ത സാഹചര്യം ഉണ്ടായിരുന്നു. വീട് പണിക്കും അര്ബുദ ബാധിതയായ എട്ടു വയസുകാരി ആരഭിയുടെ ചികിത്സയ്ക്കുമായിട്ടാണ് രാജപ്പന് കേരള ബാങ്കില് നിന്ന് വായ്പയെടുത്തിരുന്നത്. പക്ഷെ തിരിച്ചടയ്ക്കാന് കഴിയാത്തതിനെ തുടര്ന്ന് ജപ്തി ഭീഷണി നേരിടുകയായിരുന്നു.
അഞ്ച് ദിവസം മുന്പാണ് താന് ഈ വാര്ത്ത ശ്രദ്ധിച്ചതെന്നും അതിന്റെ പശ്ചാത്തലത്തില് വിളിച്ച് അന്വേഷിച്ചു. കുടുംബത്തിന് സമാധാനപരമായി കിടന്നുറങ്ങണം അതിനുള്ള സൗകര്യമാണ് ഇപ്പോള് ഒരുക്കി കൊടുത്തിട്ടുള്ളത്. കുട്ടിയുടെ ചികിത്സയുമായി ബന്ധപ്പെട്ട് ഡോക്ടര്മാരോട് സംസാരിച്ചിരുന്നു. എത്രയും വേഗം വേണ്ടതെല്ലാം ചെയ്യും. കുട്ടിയുടെയും കുടുംബത്തിന്റെയും ജീവിതം കുറച്ചുകൂടി നല്ലരീതിയില് ആക്കാന് പറ്റുമോയെന്ന് നമുക്കെല്ലാം ശ്രമിക്കാമെന്നും സുരേഷ്ഗോപി പറഞ്ഞു.
