തിരുവനന്തപുരം: സഹകരണ ബാങ്കിലെ 18 സ്ഥിര നിക്ഷേപങ്ങള്‍ പിന്‍വലിക്കാന്‍ സാധിക്കുന്നില്ലെന്ന വയോധികയുടെ പരാതിയില്‍ ഇടപെട്ട് ലോകായുക്ത.ഒരു മാസത്തിനകം പണം കൊടുക്കണമെന്ന് ബാങ്ക് പ്രസിഡന്റിനും സെക്രട്ടറിക്കും ലോകായുക്ത നിര്‍ദേശം നല്‍കി.
ഊരൂട്ടമ്പലം സഹകരണ ബാങ്കിനെതിരെയാണ് റസല്‍പുരം സ്വദേശിനി എണ്‍പത് വയസുകാരി പത്മാവതി അമ്മ പരാതി നല്‍കിയത്.ഊരൂട്ടമ്പലം സഹകരണ ബാങ്ക് പ്രസിഡന്റും സെക്രട്ടറിയും ഫണ്ട് ദുരുപയോഗം ചെയ്തു എന്ന് ആരോപിച്ചാണ് പത്മാവതി അമ്മ ലോകായുക്തയില്‍ പരാതിയുമായി എത്തിയത്.
ഈ കേസിലാണ് പരാതിക്കാരിയുടെ 18 സ്ഥിര നിക്ഷേപങ്ങള്‍ ഒരു മാസത്തിനകം തിരികെ നല്‍കാന്‍ ഉത്തരവായത്. കേസ് ഫയലില്‍ സ്വീകരിച്ച് എതിര്‍ കക്ഷികള്‍ക്ക് നോട്ടീസ് അയച്ചു. ഒക്ടോബര്‍ പത്തിന് ലോകായുക്ത മുമ്പാകെ ഹാജരാകണമെന്നാണ് നിര്‍ദേശം.
