ന്യൂദല്‍ഹി: അബുദാബി കിരീടാവകാശി ഷെയ്ഖ് ഖാലിദ് ബിന്‍ മുഹമ്മദ് ബിന്‍ സായിദ് അല്‍ നഹ്യാനും പ്രധാനമന്ത്രി നരേന്ദ്ര മോദിയും തന്ത്രപ്രധാന കരാറുകളില്‍ ഒപ്പുവച്ചു.
ഊര്‍ജ സഹകരണം വിപുലീകരിക്കാനുള്ള നാലു കരാറുകളിലാണ് ഒപ്പുവച്ചത്. ഭാരതത്തില്‍ രണ്ടു ദിവസത്തെ ഔദ്യോഗിക സന്ദര്‍ശനത്തിനെത്തിയതാണ് അബുദാബി കിരീടാവകാശി.
വിവിധ മേഖലകളില്‍ ഇരുരാജ്യങ്ങളും സഹകരണം ശക്തമാക്കാന്‍ ധാരണയായി. അബുദാബി നാഷണല്‍ ഓയില്‍ കമ്പനിയും ഇന്ത്യന്‍ ഓയില്‍ കോര്‍പ്പറേഷന്‍ ലിമിറ്റഡും തമ്മിലെ എല്‍എന്‍ജി വിതരണത്തിനുള്ള ദീര്‍ഘകാല കരാറാണ് പ്രധാനപ്പെട്ടത്. ഇന്ത്യ സ്ട്രാറ്റജിക് പെട്രോളിയം റിസര്‍വ് ലിമിറ്റഡുമായും കരാറായിട്ടുണ്ട്.
കൂടാതെ എമിറേറ്റ്സ് ന്യൂക്ലിയര്‍ എനര്‍ജിയും ന്യൂക്ലിയര്‍ പവര്‍ കോര്‍പ്പറേഷന്‍ ഇന്ത്യ ലിമിറ്റഡും ധാരണാപത്രത്തില്‍ ഒപ്പുവച്ചു. അബുദാബി ഓണ്‍ഷോര്‍ ബ്ലോക്കും ഊര്‍ജ ഭാരതും തമ്മിലാണ് നാലാമത്തെ കരാര്‍. ഭാരതത്തില്‍ ഫുഡ് പാര്‍ക്കുകള്‍ സ്ഥാപിക്കുന്നതു സംബന്ധിച്ച കരാറില്‍ ഗുജറാത്ത് സര്‍ക്കാരും അബുദാബി ഡെവലപ്‌മെന്റല്‍ ഹോള്‍ഡിങ് കമ്പനിയും ഒപ്പുവച്ചു.
ഷെയ്ഖ് ഖാലിദിനെ ഹൈദരാബാദ് ഹൗസിലാണു മോദി സ്വീകരിച്ചത്. ഉറ്റ സുഹൃത്തിന് ഊഷ്മള സ്വാഗതമെന്നാണു ഷെയ്ഖ് ഖാലിദ്-മോദി കൂടിക്കാഴ്ചയെ വിദേശകാര്യ മന്ത്രാലയം വിശേഷിപ്പിച്ചത്. കൂടിക്കാഴ്ചയുടെ ചിത്രങ്ങളും പങ്കുവച്ചിട്ടുണ്ട്.
മോദിയുമായുള്ള കൂടിക്കാഴ്ചയ്‌ക്കു ശേഷം ഷെയ്ഖ് ഖാലിദ് രാജ്ഘട്ടിലെത്തി ഗാന്ധിജിക്ക് ആദരമര്‍പ്പിച്ചു. രാഷ്‌ട്രപതി ഭവനില്‍ രാഷ്‌ട്രപതി ദ്രൗപദി മുര്‍മുവുമായി ചര്‍ച്ച നടത്തി. ഇന്നു മുംബൈക്കു പോകുന്ന അദ്ദേഹം ബിസിനസ് ഫോറത്തില്‍ പങ്കെടുക്കും, വ്യവസായ രംഗത്തെ പ്രമുഖരെ കാണും.
