തിരുവനന്തപുരം: ഇപി ജയരാജന് എല്‍ഡിഎഫ് കണ്‍വീനര്‍ സ്ഥാനം ഒഴിഞ്ഞ സാഹചര്യത്തില്‍ ടിപി രാമകൃഷ്ണന് പകരം ചുമതല നല്‍കിയെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. ടി പിക്കെതിരെ സംഘടനാ നടപടി ഉണ്ടായിട്ടില്ല. അദ്ദേഹം കേന്ദ്ര കമ്മിറ്റിയംഗമാണെന്നും പാര്‍ട്ടി സംസ്ഥാന സെക്രട്ടറി ചൂണ്ടിക്കാട്ടി.തിരുവനന്തപുരത്ത് വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
എല്‍ഡിഎഫ് കണ്‍വീനര്‍ സ്ഥാനത്ത് ഇപി ജയരാജന്റെ പ്രവര്‍ത്തനത്തില്‍ പരിമിതികളുണ്ടായി. തെരഞ്ഞെടുപ്പുമായി ബന്ധപ്പെട്ട് നടത്തിയ പ്രതികരണത്തിലെ പ്രശ്‌നങ്ങളും കാരണമായി. പല വിഷയങ്ങളും പരിശോധിച്ചതിന്റെ ഭാഗമായാണ് തീരുമാനമെന്ന് എം വി ഗോവിന്ദന്‍ പറഞ്ഞു.മണ്ണാര്‍ക്കാട് ഏരിയാ കമ്മിറ്റി പുനഃസംഘടിപ്പിക്കും. തെരഞ്ഞെടുക്കപ്പെട്ട പാര്‍ട്ടി പദവികളില്‍ നിന്ന് പികെ ശശിയെ ഒഴിവാക്കി. കെടിഡിസി ചെയര്‍മാന്‍ സ്ഥാനം സര്‍ക്കാരിന്റെ ഭാഗമായുള്ള പദവിയാണ്.
ഹേമ കമ്മിറ്റി റിപ്പോര്‍ട്ടില്‍ സംസ്ഥാന സര്‍ക്കാര്‍ അമാന്തം കാട്ടിയിട്ടില്ലെന്ന് പറഞ്ഞ എം വി ഗോവിന്ദന്‍ കുറ്റാരോപിതനായ മുകേഷ് എംഎല്‍എ സ്ഥാനം രാജിവെക്കേണ്ടതില്ലെന്നും വ്യക്തമാക്കി.എന്നാല്‍ സിനിമാ നയരൂപീകരണ സമിതിയില്‍ നിന്ന് മുകേഷിനെ ഒഴിവാക്കും.കേസ് അന്വേഷണത്തില്‍ എംഎല്‍എ എന്ന നിലയില്‍ ഒരു ആനുകൂല്യവും മുകേഷിന് നല്‍കില്ല.സ്ത്രീകള്‍ക്കെതിരെ അതിക്രമങ്ങളില്‍ രാജ്യത്ത് 135 എംഎല്‍എമാരും 16 എംപിമാരും പ്രതികളാണ്.എന്നാല്‍ അവരാരും രാജിവെച്ചിട്ടില്ല. ധാര്‍മ്മികതയുടെ പേരില്‍ രാജിവെച്ചാല്‍ കുറ്റവിമുക്തനാണെന്ന് പിന്നീട് വ്യക്തമായാല്‍ തിരിച്ചുവരവിന് അവസരം ഉണ്ടാകില്ലെന്നതും എംവി ഗോവിന്ദന്‍ ചൂണ്ടിക്കാട്ടി.
ഇന്ത്യയിലാദ്യമായാണ് ഹേമ കമ്മിറ്റി പോലൊരു സംവിധാനം ഉണ്ടാക്കിയത്. ഇത് ജുഡീഷ്യല്‍ കമ്മീഷനല്ല. ഹേമ കമ്മിറ്റി നല്‍കിയ ശുപാര്‍ശ ഏറ്റെടുത്ത് നടപ്പാക്കുകയാണ് സര്‍ക്കാര്‍ ചെയ്യേണ്ടത്. സിനിമാ രംഗത്ത് ഐസിസി ആദ്യം തുടങ്ങിയതും കേരളത്തിലാണെന്ന് എം വി ഗോവിന്ദന്‍ ചൂണ്ടിക്കാട്ടി.
സിനിമാ നയ രൂപീകരണത്തിന് കമ്മിറ്റി രൂപീകരിച്ചിട്ടുണ്ട്. സിനിമാ കോണ്‍ക്ലേവിന് എതിര്‍ നിലപാടുകളുമുണ്ട്. എല്ലാവരുമായി ചര്‍ച്ച ചെയ്താകും മുന്നോട്ട് പോകുക.നിയമനിര്‍മ്മാണവും ട്രിബ്യൂണലും അനിവാര്യമാണ്. ഹേമ കമ്മിറ്റി റിപ്പോര്‍ട്ടിലെ ചില വിവരങ്ങള്‍ വ്യക്തികളുടെ സ്വകാര്യതയെ ബാധിക്കുന്നതിനാല്‍ പുറത്തു വിടരുതെന്ന ജസ്റ്റിസ് ഹേമയുടെ കത്തിന്റെ അടിസ്ഥാനത്തിലാണ് റിപ്പോര്‍ട്ട് പുറത്തുവിടാതിരുന്നത്.
സിപിഎമ്മില്‍ പവര്‍ ഗ്രൂപ്പുണ്ടെന്നാണ പ്രതിപക്ഷ വി ഡി സതീശന്‍ വിഡി സതീശന്‍ പറയുന്നത്. എന്നാല്‍ എഐസിസി അംഗം സിമി റോസ്ബെല്‍ പറയുന്നത് കോണ്‍ഗ്രസിലെ യോഗ്യത നേതാക്കളുമായുള്ള ബന്ധമാണെന്നും അവസരം കിട്ടാന്‍ ചൂഷണത്തിന് നിന്നുകൊടുക്കണമെന്നുമാണ്. പ്രീതിപ്പെടുത്താന്‍ നിന്നുകൊടുക്കാത്തത് കൊണ്ട് പ്രതിപക്ഷ നേതാവിന്റെ ഗുഡ് ബുക്കില്‍ ഇടംകിട്ടിയെന്നും പറയുന്നുണ്ടെന്ന് എം വി ഗോവിന്ദന്‍ ചൂണ്ടിക്കാട്ടി.
