കൊച്ചി: മൂവാറ്റുപുഴ കടാതിയിൽ അർദ്ധസഹോദരങ്ങൾ തമ്മിലുള്ള തർക്കത്തിനിടെ വെടിവെപ്പ്. സംഭവത്തിൽ ഒരാൾക്ക് വയറിന് വെടിയേറ്റു. വ്യാഴാഴ്ച്ച രാത്രി ഒരുമണിയോടെയാണ് സംഭവം നടക്കുന്നത്. സഹോദരിമാരുടെ മക്കളായ ജഗൻ കിഷോറും നവീനും തമ്മിൽ ദീർഘനാളുകളായി തർക്കം നിലനിന്നിരുന്നു. ഇതിനു പിന്നാലെ വ്യാഴാഴ്ച്ച രാത്രി ഉണ്ടായ തർക്കത്തിൽ രോഷാകുലനായ കിഷോർ നവീനു നേരേ വെടിവെയ്ക്കുകയായിരുന്നു.
തൊട്ടടുത്തടുത്ത വീടുകളിലാണ് ജഗനും നവീനും താമസിക്കുന്നത്. ഇവർ തമ്മിൽ സ്ഥിരമായി വഴക്കുണ്ടാകാറുണ്ടെന്ന് നാട്ടുകാർ പറയുന്നു. വയറിനു വെടിയേറ്റ നവീനെ ഉടനെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചു. നവീന്റെ ശരീരത്തിലൂടെ ബുള്ളറ്റ് തുളച്ചുകയറി പുറത്തേയ്ക്ക് പോവുകയായിരുന്നു. അടിയന്തര ശസ്ത്രക്രിയയ്ക്ക് വിധേയനായ നവീന്റെ നില ഗുരുതരമാണെന്നാണ് വിവരം.
സംഭവത്തിൽ നവീന്റെ അർദ്ധസഹോദരനായ കിഷോറിനെ പോലീസ് കസ്റ്റഡിയിലെടുത്തു. ലൈസന്സ് ഉള്ള തോക്ക് ഉപയോഗച്ചാണ് വെടിവച്ചതെന്ന് പൊലീസ് വ്യക്തമാക്കി. വെടിവെപ്പിനിടെ ഒച്ച കേട്ട് സമീപത്ത് ഉണ്ടായിരുന്നവരും നാട്ടുകാരുമാണ് പോലീസിൽ വിവരമറിയിച്ചത്. പ്രകോപനത്തിന് പിന്നിലുള്ള കാരണമെന്തെന്ന് വ്യക്തമല്ല. പോലീസും ഫോൻസിക് വിദഗ്ദ്ധരും സ്ഥലത്തെത്തി തെളിവുകൾ ശേഖരിച്ചിട്ടുണ്ട്.
