വയനാട് : വയനാട് ഉരുള്പൊട്ടലില് പത്ത് ദിവസം നീണ്ട രക്ഷാദൗത്യം അവസാനിപ്പിച്ച് ദുരന്തബാധിത പ്രദേശങ്ങളായ മുണ്ടക്കൈ, ചൂരല്മല എന്നിവിടങ്ങളില് നിന്നും സൈന്യം മടങ്ങി. സംസ്ഥാനത്തെ ഏറ്റവും വലിയ ദുരന്തത്തിന് സമാനതകളില്ലാത്ത രക്ഷാ പ്രവര്ത്തനങ്ങളില് പങ്കാളിയായാണ് സൈന്യം ഇവിടെ നിന്നും തിരിക്കുന്നത്. വയനാട്ടിലേത് ഒരു കൂട്ടായ ദൗത്യമായിരുന്നുവെന്നും ഇതിനെ ജോലിയായി കണക്കാക്കിയിട്ടില്ലെന്നും കര്ത്തവ്യം ചെയ്യാനാണ് ഇവിടെ എത്തിയതെന്നും ലെഫ്. കേണല് ഋഷി രാജലക്ഷ്മി പറഞ്ഞു.
ഭരണകൂടത്തിന് നന്ദിയെന്ന് സൈന്യം അറിയിച്ചു. സൈന്യം ഭാഗീകമായാണ് പിന്മാറുന്നത്. താത്കാലികമായി നിര്മ്മിച്ച ബെയ്ലി പാലം മെയ്ന്റനന്സ് ടീം പ്രദേശത്ത് തുടരും. ഹെലികോപ്റ്റര് സെര്ച്ച് ടീമും അടുത്ത നിര്ദേശം വരുന്നത് വരെ തുടരും. ബാക്കിയുള്ളവരാണ് മടങ്ങുകയെന്നും സൈന്യം അറിയിച്ചു. വയനാട്ടില് നിന്നും മടങ്ങുന്ന സൈന്യത്തിന് സര്ക്കാരും ജില്ലാ ഭരണകൂടവും യാത്രയയപ്പ് നല്കും.
സൈന്യത്തിന്റെ എല്ലാ സംഘങ്ങളും മടങ്ങുമെങ്കിലും രക്ഷാപ്രവര്ത്തനം പൂര്ണമായും എന്ഡിആര്എഫ്, എസ്ഡിആര്എഫ്, ഫയര്ഫോഴ്സ്, പൊലീസ് എന്നീ സേനകള്ക്ക് കൈമാറുമെന്നും സൈന്യം അറിയിച്ചു. സൈന്യത്തിന്റെ 500 അംഗ സംഘമാണ് മടങ്ങുന്നത്. തിരുവനന്തപുരം, കോഴിക്കോട്, കണ്ണൂര്, ബെംഗളുരു എന്നിവിടങ്ങളില് നിന്നുള്ള ബറ്റാലിയന് അംഗങ്ങളാണിവര്.
