ചൂരല്‍മല: സര്‍വ്വതും തുടച്ചുനീക്കി ഇരുളില്‍ ഇരച്ചെത്തിയ ആ വലിയ ഉരുള്‍പൊട്ടലിനെതിരെ മതിലായി മാറി വെള്ളാര്‍മല ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂള്‍. സ്‌കൂളിന്റെ പഴയ കെട്ടിടങ്ങള്‍ ഉരുള്‍ വിഴുങ്ങിയെങ്കിലും പുതിയ കെട്ടിടം സ്വയം നശിച്ചപ്പോഴും ഒരു നാടിനെ പൂര്‍ണമായി ഭൂമുഖത്ത് നിന്നും തുടച്ചുനിക്കുന്നതിന് തടസമായി നിന്നു. ആ ഇരുനിലക്കെട്ടിടമില്ലായിരുന്നുവെങ്കില്‍ ചൂരല്‍മല ടൗണ്‍ ഭൂമിയില്‍ നിന്നു തന്നെ ആ രാത്രി അപ്രത്യക്ഷമായേനെ.
2021-23 വര്‍ഷത്തില്‍ നിര്‍മിച്ചതാണ് വെള്ളാര്‍മല ഗവ. വൊക്കേഷനല്‍ ഹയര്‍ സെക്കന്‍ഡറിയുടെ ഇരുനിലക്കെട്ടിടം. ഈ കെട്ടിടത്തിന്റെ മുന്നിലൂടെ ഒഴുകിച്ചെന്ന കൂറ്റന്‍ പാറകളും മരങ്ങളും മണ്ണും കൂടിച്ചേര്‍ന്നാണ് പാടികളും വീടുകളും തകര്‍ത്തെറിഞ്ഞ് ദുരന്തം വിതച്ചത്. എന്നാല്‍, സ്‌കൂള്‍ കെട്ടിടത്തില്‍ തടഞ്ഞുനിന്ന മരങ്ങള്‍ അവിടെ നിന്നു നീങ്ങിയിട്ടില്ല.
ഒട്ടേറെ വീടുകള്‍ക്കും കെട്ടിടങ്ങള്‍ക്കും അവയില്‍ കഴിച്ചുകൂട്ടിയ മനുഷ്യര്‍ക്കും സംരക്ഷണം നല്കുകയായിരുന്നു ഈ സ്‌കൂള്‍ കെട്ടിടം. മണിക്കൂറുകള്‍ നീണ്ട ദുരന്തം അവസാനിച്ചപ്പോഴും സ്‌കൂള്‍ പൂര്‍ണമായും തകര്‍ന്നില്ല. പുഴ വഴിമാറിയപ്പോള്‍ ഒഴുകിയെത്തിയ കൂറ്റന്‍ കരിങ്കല്ലുകളാണ് സ്‌കൂള്‍ ഗ്രൗണ്ടിലും പരിസരങ്ങളിലുമായി ചിതറിക്കിടക്കുന്നത്. വഴിമാറി പരന്നൊഴുകുന്ന പുഴയാവട്ടെ ഇന്നും ഒഴുകിക്കൊണ്ടേ ഇരിക്കുന്നു.
