വയനാട്: മുണ്ടക്കൈ ഉരുള്‍പൊട്ടല്‍ ദുരന്തമുഖത്തെ രക്ഷാപ്രവര്‍ത്തകരില്‍ പലര്‍ക്കും പ്രഭാതഭക്ഷണം ലഭിച്ചില്ലെന്ന് പരാതി.കാലാവധി കഴിഞ്ഞ ബ്രെഡ് പായ്‌ക്കറ്റുകളാണ് ചിലര്‍ക്ക് ലഭിച്ചതെന്നും പരാതിയുണ്ട്. ചൂരല്‍മലയില്‍ നിന്ന് ആറ് കിലോമീറ്ററിലേറെ നടന്നാണ് സന്നദ്ധ പ്രവര്‍ത്തകര്‍ പുഞ്ചിരിമട്ടത്തേക്കും മുണ്ടക്കൈയിലേക്കും എത്തുന്നത്.
ഇവിടങ്ങളില്‍ എളുപ്പം ഭക്ഷണം ലഭ്യമല്ലാത്തതിനാല്‍ കൃത്യമായി ഭക്ഷണം വിതരണം ചെയ്യാത്തത് തങ്ങളുടെ പ്രവര്‍ത്തനങ്ങളെ ഉള്‍പ്പെടെ ബാധിക്കുന്നുണ്ടെന്നാണ് രക്ഷാപ്രവര്‍ത്തകര്‍ പരാതിപ്പെട്ടത്.മണിക്കൂറുകള്‍ വൈകിയാണ് ഭക്ഷണം ലഭിച്ചതെന്നും വിതരണം ചെയ്തതില്‍ ചില ബ്രെഡ് പായ്‌ക്കറ്റുകള്‍ കാലാവധി കഴിഞ്ഞതാണെന്നും പരാതി ഉയര്‍ന്നു.
ഭക്ഷണം കൊണ്ടുവരുന്നവരെ പൊലീസ് തടയുന്നതായും പരാതിയുണ്ട്. ഭക്ഷ്യസുരക്ഷാ വകുപ്പിന്റെ പരിശോധന കഴിഞ്ഞ് മാത്രം ഭക്ഷണം വിതരണം ചെയ്താല്‍ മതിയെന്ന് റവന്യൂ വകുപ്പ് നിര്‍ദ്ദേശം നല്‍കിയെന്നും നാട്ടുകാര്‍ പറയുന്നു.
അതേസമയം ഭക്ഷണം ലഭിക്കുന്നില്ലെന്ന് സന്നദ്ധ പ്രവര്‍ത്തകര്‍ക്ക് പരാതിയുണ്ടെങ്കില്‍ ഉടന്‍ പരിഹരിക്കുമെന്ന് റവന്യൂ മന്ത്രി കെ രാജന്‍ അറിയിച്ചു.
