തൃശൂർ: “സുരേഷേട്ടന് ജയിച്ചതോടെ തൃശൂര്‍ സേഫ് ആയി. ഇനി തൃശൂരില്‍ മാറ്റങ്ങള്‍ സംഭവിക്കും. ജയിച്ച ഒരു മാസത്തിനുള്ളിൽ അത് എവിടെ എന്ന് ചോദിക്കരുത്. സമയം നൽകൂ, സുരേഷേട്ടൻ ചെയ്യും. ഒരുപാട് മാറ്റങ്ങൾ തൃശ്ശൂരിൽ സംഭവിക്കും”- നടി ജ്യോതികൃഷ്ണയാണ് ഒരു ഓണ്‍ലൈന്‍ അഭിമുഖത്തില്‍ ഇക്കാര്യം പറഞ്ഞത്.
നടന്‍ സുരേഷ് ഗോപിയുടെ കൈകളിൽ തൃശൂര്‍ പാര്‍ലമെന്‍റ് മണ്ഡലം സുരക്ഷിതമാണ്. ഒരുപാട് നല്ല മാറ്റങ്ങൾ തൃശൂരിൽ ഉണ്ടാകുമെന്നും അതിനുള്ള സമയം അനുവദിച്ചാൽ മാത്രം മതിയെന്നും ജ്യോതികൃഷ്ണ. പറഞ്ഞു. ഈ പ്രസ്താവനയുടെ പേരില്‍ തന്നെ സംഘി എന്ന് വിളിച്ചാലും പ്രശ്നമില്ലെന്ന് ജ്യോതി കൃഷ്ണ അഭിപ്രായപ്പെട്ടു.
“ഞാൻ ഇതുവരെ വോട്ട് ചെയ്തിട്ടില്ല. ഒരു പാർട്ടിയിലും വിശ്വസിക്കുന്ന ആളല്ല ഞാൻ. സത്യത്തിൽ എനിക്ക് പാർട്ടിയില്ല. ഞാൻ വ്യക്തികളെയാണ് നോക്കാറുള്ളത്. ഇത്തവണത്തെ തെരഞ്ഞെടുപ്പിൽ വോട്ട് ചെയ്യണമെന്ന് വലിയ ആഗ്രഹമുണ്ടായിരുന്നു. തൃശ്ശൂർ ആയിരുന്നു വോട്ട്. സുരേഷേട്ടന് വോട്ട് ചെയ്യണമെന്ന് വലിയ ആഗ്രഹമായിരുന്നു. പക്ഷേ ചില വ്യക്തിപരമായ കാരണങ്ങളാല്‍ എനിക്ക് വരാൻ കഴിഞ്ഞില്ല.”.-ജ്യോതികൃഷ്ണ പറഞ്ഞു.
“എന്റെ ആദ്യ വോട്ട് സുരേഷേട്ടന് ചെയ്യണമെന്ന് വിചാരിച്ചിരുന്നതാണ്. സംഘി ആണെന്ന് പറയുകയാണെങ്കിൽ പറയട്ടെ. എന്താ അതിനിത്ര കുഴപ്പം. പറയുന്നവർ പറഞ്ഞുകൊണ്ടേയിരിക്കും. അങ്ങനെ പറയുന്നവർക്ക് ഉയർച്ചയോ താഴ്ചയോ ഉണ്ടാകുന്നുണ്ടോ?. സുരേഷേട്ടന് ഫുൾടൈം ഓണ്‍ലൈനില്‍ നിറഞ്ഞു നിൽക്കുകയാണ്”- അവര്‍ പറഞ്ഞു.
“എന്റെ ഫാമിലി ഫ്രണ്ടാണ് സുരേഷേട്ടൻ. എപ്പോൾ മെസ്സേജ് അയച്ചാലും, എത്ര തിരക്കായാലും മറുപടി നൽകും. ഏട്ടനെക്കാളും വല്യച്ഛൻ എന്ന ഫീലാണ് എനിക്ക് തോന്നിയിട്ടുള്ളത്.”-ജ്യോതി കൃഷ്ണ പറഞ്ഞു.
