തൃശൂര്‍: നാലോണ നാളില്‍ തൃശൂരിനെ വിറപ്പിക്കാന്‍ ഇക്കുറി കൂടുതല്‍ പുലികള്‍. പുലിക്കളിയില്‍ ഇത്തവണ കൂടുതല്‍ ടീമുകള്‍ അണിനിരക്കും.കഴിഞ്ഞവര്‍ഷം 5 ടീമുകള്‍ ആയിരുന്നുവെങ്കില്‍ ഇത്തവണ 10 ടീമുകള്‍ അണിനിരക്കുമെന്നാണ് വിവരം.
വിയ്യൂര്‍ സെന്റര്‍, അയ്യന്തോള്‍ ദേശം, സീതാറാം മില്‍, കാനാട്ടുകര, ശക്തന്‍, ശങ്കരംകുളങ്ങര ദേശം, ചക്കാമുക്ക, പാട്ടുരായ്‌ക്കല്‍, വിയ്യൂര്‍, പൂങ്കുന്നം ടീമുകള്‍ ഇക്കുറി പുലിക്കളി സംഘങ്ങളുമായി രംഗത്തിറങ്ങുമെന്നാണ് സൂചന. 27 നാണ് സംഘാടക സമിതി യോഗം ചേരുന്നത്. ഓണാഘോഷത്തിന് സമാപനം കുറിച്ചുകൊണ്ടാണ് എല്ലാക്കൊല്ലവും തൃശൂരിൽ പുലികളി അരങ്ങേറുന്നത്.
കടുത്ത വർണങ്ങളണിഞ്ഞ പുലിവീരൻമാരും പെൺപുലികളും കുട്ടിപ്പുലികളും തൃശൂർ നഗരത്തെ വളയുന്ന സുന്ദരമായ കാഴ്ച കാണാൻ നാടൊന്നാകെ എത്തും. പുള്ളിപ്പുലി, വരയൻ പുലി, ചീറ്റപ്പുലി എന്ന് തുടങ്ങി കരിമ്പുലിയും ഹിമപ്പുലിയും വരെ നിരത്തുകൾ കയ്യടക്കും.
