നെയ്യാറ്റിന്‍കര: നെയ്യാറ്റിന്‍കര ജില്ലാ ജനറല്‍ ആശുപത്രിയില്‍ ചികിത്സാ പിഴവ്. വയറുവേദനയെ തുടര്‍ന്ന് ചികിത്സയ്‌ക്കെത്തിയ യുവതിക്ക് കുത്തിവെയ്‌പ്പെടുത്തതോടെ കുഴഞ്ഞുവീണു. ഗുരുതരാവസ്ഥയിലായ യുവതി തിരുവനന്തപുരം മെഡിക്കല്‍കോളജ് ആശുപത്രിയിലെ വെന്റിലേറ്ററിലാണ്.
ഈ മാസം 15 നാണ് കാട്ടാക്കട മച്ചേല്‍ സ്വദേശി കൃഷ്ണ തങ്കപ്പനെ നെയ്യാറ്റിന്‍കര ജില്ലാ ജനറല്‍ ആശുപത്രിയില്‍ പ്രവേശിപ്പിച്ചത്. തുടര്‍ന്ന് നല്‍കിയ കുത്തിവയ്‌പില്‍ യുവതി അബോധാവസ്ഥയിലായി എന്നാണ് ബന്ധുക്കള്‍ പോലീസിന് നല്‍കിയ പരാതിയില്‍ പറയുന്നത്. ഗുരുതരാവസ്ഥയിലായ യുവതിയെ ഉടന്‍ തന്നെ തിരുവനന്തപുരം മെഡിക്കല്‍ കോളജിലെ വെന്റിലേറ്ററിലേക്ക് മാറ്റി. കുത്തിവയ്‌പില്‍ വന്ന പിഴവാണ് യുവതിയുടെ നില ഗുരുതരമാകാന്‍ കാരണമെന്ന് ബന്ധുക്കള്‍ ആരോപിച്ചു. തുടര്‍ന്ന് ബന്ധുക്കള്‍ നെയ്യാറ്റിന്‍കര പോലീസില്‍ പരാതി നല്‍കി. യുവതിയെ ചികിത്സിച്ച ഡോക്ടര്‍ വിനുവിനെതിരെ പോലീസ് കേസെടുത്തു.
സംഭവത്തില്‍ പോലീസ് അന്വേഷണം ആരംഭിച്ചിട്ടുമുണ്ട്. ചികിത്സാപിഴവ് സംബന്ധിച്ച് നിരവധി പരാതികളാണ് നെയ്യാറ്റിന്‍കര ജനറല്‍ ആശുപത്രിക്കെതിരെ ഉയരുന്നത്.
