ഹരാരെ: സിംബാബ്‌വെയിലെത്തിയെ ഭാരത ട്വിന്റി20 ക്രിക്കറ്റിലെ രണ്ടാം നിര രണ്ടാം മത്സരത്തില്‍ ക്ഷീണം തീര്‍ത്തത് നൂറ് റണ്‍സ് ജയത്തോടെ. ശനിയാഴ്ച നടന്ന ആദ്യ പോരാട്ടത്തില്‍ 13 റണ്‍സിനായിരുന്നു ഭാരതത്തിന്റെ തോല്‍വി. അഞ്ച് മത്സര പരമ്പരയില്‍ വിജയത്തോടെ ഭാരതം 1-1 സമനില പിടിച്ചു. ബുധനാഴ്ചയാണ് മൂന്നാം മത്സരം.
തുടക്കത്തിലേ രണ്ട് റണ്‍സെടുത്ത നായകന്‍ ശുഭ്മാന്‍ ഗില്ലിനെ നഷ്ടപ്പെട്ടതോടെ ആദ്യ മത്സരത്തിലെ ദുര്‍ഭൂതം വിട്ടിട്ടില്ലെന്ന് തോന്നിച്ചു. എന്നാല്‍ രണ്ടാം വിക്കറ്റില്‍ അഭിഷേക് ശര്‍മയും ഋതുരാജ് ഗെയ്‌ക്ക്‌വാദും ചേര്‍ന്ന് പതുക്കെ സ്‌കോര്‍ ഗ്രിപ്പ് കണ്ടെത്താന്‍ ശ്രമിച്ചു. അതിവേഗം താളത്തിലായ അഭിഷേക് പിന്നീട് അടിച്ചു തകര്‍ക്കുന്ന കാഴ്‌ച്ചയാണ് കണ്ടത്. ഏഴ് ബൗണ്ടറികളും എട്ട് സിക്‌സറും സഹിതം 100 റണ്‍സെടുത്താണ് താരം ക്രീസ് വിട്ടത്. പത്ത് റണ്‍സില്‍ ആദ്യ വിക്കറ്റ് നഷ്ടപ്പെട്ട ഭാരതത്തിന്റെ രണ്ടാം വിക്കറ്റ് വീണത് 147 റണ്‍സിലാണ്. 14-ാം ഓവറില്‍ അഭിഷേക് ശര്‍മ ആണ് പുറത്തായത്. പിന്നീട് ഭാരത ഇന്നിങ്‌സില്‍ ആരും തന്നെ പുറത്തായില്ല.
ഋതുരാജ് ഗെയ്‌ക്ക്‌വാദും(പുറത്താകാതെ 77) റിങ്കു സിങ്ങും(പുറത്താകാതെ 48) ചേര്‍ന്ന് ഭാരത സ്‌കോര്‍ 200നപ്പുറം എത്തിച്ചു. അവസാന ആറ് ഓവറുകള്‍ നേരിട്ട മൂന്നാം വിക്കറ്റ് കൂട്ടുകെട്ട് 87 റണ്‍സാണ് കൂട്ടിചേര്‍ത്തത്.
ഭാരത ഇന്നിങ്‌സില്‍ ആദ്യ പത്ത് ഓവറില്‍ വെറും 74 റണ്‍സേ ഉണ്ടായിരുന്നുള്ളൂ. രണ്ടാമത്തെ പത്ത് ഓവറുകളില്‍ 160 റണ്‍സെടുത്തു.
മറുപടി ബാറ്റിങ്ങിനിറങ്ങിയ സിംബാബ്‌വെയെ ഭാരതം 18.4 ഓവറില്‍ 134 റണ്‍സില്‍ ഓള്‍ ഔട്ടാക്കി. മൂന്ന് വിക്കറ്റ് വീതം നേടി മുകേഷ് കുമാറും ആവേശ് ഖാനും മികവ് കാട്ടി. രണ്ട് വിക്കറ്റ് നേട്ടത്തോടെ രവി ബിഷ്‌നോയ് മികച്ച പിന്തുണ നല്‍കി.
സിംബാബ്‌വെ നിരയില്‍ വെസ്ലി മാധെവെറെ(43)യും ബ്രയാന്‍ ബെന്നെറ്റും(26) പൊരുതി നോക്കി. വാലറ്റക്കാരെ കൂട്ടുപിടിച്ച് ലൂക് ജോങ്‌വെ പൊരുതി ഓളൗട്ടാകാതെ പിടിച്ചു നില്‍ക്കാന്‍ നോക്കിയെങ്കിലും 33 റണ്‍സെടുത്ത താരം പത്താമനായി പുറത്തായി.
നേരത്തെ ടോസ് നേടിയ ഭാരത നായകന്‍ ശുഭ്മാന്‍ ഗില്‍ ബാറ്റിങ് തെരഞ്ഞെടുക്കുകയായിരുന്നു. താരത്തിന്റെ തുടക്കത്തിലേയുള്ള പുറത്താകലിനെ തുടര്‍ന്ന് സമ്മര്‍ദ്ദത്തിലാകാതെ ബാറ്റിങ് തുടര്‍ന്ന അഭിഷേക് ശര്‍മയാണ് കളിയിലെ താരം.
