മലപ്പുറം: എടപ്പാളില്‍ കെട്ടിട നിര്‍മ്മാണ നിര്‍മ്മാണ സാമഗ്രികള്‍ ഇറക്കിയവരെ സിഐടിയു തൊഴിലാളികള്‍ ആക്രമിച്ച സംഭവത്തില്‍ അഞ്ച് പേരെ പൊലീസ് അറസ്റ്റു ചെയ്ത് ജാമ്യത്തില്‍ വിട്ടു. ദുര്‍ബല വകുപ്പുകള്‍ പ്രകാരമാണ് സി ഐ ടി യു തൊഴിലാളികള്‍ക്കെതിരെ കേസെടുത്തത്.
അതിനാലാണ് അഞ്ചു പേരെയും സ്റ്റേഷന്‍ ജാമ്യത്തില്‍ വിട്ടയച്ചത്. എടപ്പാള്‍ സ്വദേശികളായ സതീശന്‍, അബീഷ്, ചന്ദ്രന്‍ എന്ന രാമകൃഷ്ണന്‍, അയിലക്കാട് സ്വദേശി ഷാക്കിര്‍, ഉദിനിക്കര സ്വദേശി രാജു എന്നിവരെയാണ് അറസ്റ്റ് ചെയ്ത് ജാമ്യത്തില്‍ വിട്ടത്.
വ്യാഴാഴ്‌ച്ച രാത്രി പത്തരയോടെയാണ് കെട്ടിട നിര്‍മ്മാണ കരാറുകാരന്റെ തൊഴിലാളികളെ സി ഐ ടി യുക്കാര്‍ ആക്രമിച്ചത്.ആക്രമിച്ചവര്‍ക്കെതിരെ നടപടിയുണ്ടാവാത്തതില്‍ പ്രതിഷേധമുയര്‍ന്നതിനിടെയാണ് ദുര്‍ബല വകുപ്പുകള്‍ ചുമത്തി അറസ്റ്റ് ചെയ്ത് സ്റ്റേഷന്‍ ജാമ്യത്തില്‍ വിട്ടത്.
സി ഐ ടി യു തൊഴിലാളികളുടെ ആക്രമണത്തില്‍ നിന്ന് രക്ഷപ്പെടാന്‍ ശ്രമിച്ച കരാറുകാരന്റെ തൊഴിലാളികളില്‍ ഒരാളുടെ രണ്ട് കാലുകളും ഒടിഞ്ഞിരുന്നു.
