കൊച്ചി: വീടിന്റെ മുകള്‍ നിലയില്‍ വാടകയ്‌ക്ക് നല്‍കിയ മുറി ഒഴിഞ്ഞു കൊടുക്കാത്തതിനെ തുടര്‍ന്ന് വൃദ്ധനായ ഉടമയുടെ കുത്തിയിരിപ്പ് സമരം.കൊച്ചി അയ്യപ്പന്‍കാവില്‍ അശോകന്‍ എന്ന വ്യക്തിയുടെ ഉടമസ്ഥതയിലുള്ള കെട്ടിടത്തിന് മുന്നിലാണ് ഉടമയും ഭാര്യയും സമരം നടത്തുന്നത്. വൃദ്ധ ദമ്പതികള്‍ക്ക് പിന്തുണയുമായി നാട്ടുകാരുമെത്തി.
മുറി വാടകക്കെടുത്ത ഹൈക്കോടതി അഭിഭാഷകന്‍ തിരുവനന്തപുരം സ്വദേശി ബാബു ഗിരീഷിനെതിരെയാണ് സമരം. വിവരമറിഞ്ഞ് പൊലീസും സ്ഥലത്തെത്തി.
അഭിഭാഷകനായ ബാബു ഗിരീഷ് 24 മാസമായി വാടക നല്‍കുന്നില്ലെന്നും വാടക ശീട്ട് പുതുക്കുന്നില്ലെന്നും ഉടമ അശോകന്‍ ആരോപിക്കുന്നു. വാടക കുടിശിക ആവശ്യപ്പെട്ടപ്പോള്‍ അഭിഭാഷകന്‍ മര്‍ദ്ദിച്ചെന്നും ചവിട്ടി താഴെയിട്ടെന്നും അശോകന്‍ പറഞ്ഞു. പലപ്പോഴായി മുറി ഒഴിയാന്‍ ആവശ്യപ്പെട്ടിട്ടും ഫലമില്ല. വാടക മാത്രമാണ് തന്റെ വരുമാനം. വീട്ടില്‍ താനും അല്‍ഷിമേഴ്‌സ് ബാധിതയായ ഭാര്യയും മാത്രമാണുള്ളതെന്ന് വീട്ടുടമ പറഞ്ഞു.
എന്നാല്‍ താന്‍ കൃത്യമായി വാടക കൊടുക്കുന്നയാളാണെന്നാണ് അഭിഭാഷകന്‍ ബാബു ഗിരീഷ് പറയുന്നത്. താനില്ലാത്ത സമയത്ത് മുറിയില്‍ കയറി അശോകന്‍ വീട്ടുസാധനങ്ങള്‍ നശിപ്പിച്ചെന്നും ഫ്രിഡ്ജ് ഓഫ് ചെയ്തിട്ട് സാധനങ്ങള്‍ കേടാക്കിയെന്നും അദ്ദേഹം ആരോപിച്ചു. താന്‍ വാടക നല്‍കുന്നില്ലെങ്കില്‍ അതിനെതിരെ കോടതിയെയോ പൊലീസിനെയോ സമീപിക്കാമല്ലോയെന്നാണ് അഭിഭാഷകന്റെ വാദം.
എന്നാല്‍ വൃദ്ധനായ വീട്ടുടമയ്‌ക്ക് ഇനി നിയമനടപടിക്കുളള ആരോഗ്യമില്ലെന്നും മുറി ഒഴിയണമെന്നുമുളള നിലപാടാണ് പൊലീസ് സ്വീകരിച്ചത്. ബാര്‍ അസോസിയേഷനെ ഉള്‍പ്പെടെ അറിയിച്ച് അഭിഭാഷകനെ ഒഴിപ്പിക്കാനാണ് പൊലീസും നാട്ടുകാരും ശ്രമിക്കുന്നത്.
