കോഴിക്കോട്: തിരുവമ്പാടി കെഎസ്ഇബി ഓഫീസില്‍ യൂത്ത് കോണ്‍ഗ്രസ് നേതാവിന്റെ അതിക്രമം.ഉദ്യോഗസ്ഥരെ മര്‍ദിക്കുകയും കമ്പ്യൂട്ടര്‍ ഉള്‍പ്പെടെ ഉപകരണങ്ങള്‍ തല്ലി തകര്‍ക്കുകയും ചെയ്തു. സംഭവത്തില്‍ യു.സി അജ്മല്‍ ഇയാളുടെ സഹോദരന്‍ ഷഹ്ദാദ് എന്നിവരെ പൊലീസ് അറസ്റ്റ് ചെയ്തു.
വൈദ്യുതി ബില്ല് അടക്കാത്തതിനെ തുടര്‍ന്ന് യു.സി അജ്മലിന്റെ വീട്ടിലെ വൈദ്യുതി ബന്ധം കെഎസ്ഇബി വിച്ഛേദിച്ചിരുന്നു. വ്യാഴാഴ്ച പണം അടച്ചതോടെ വെള്ളിയാഴ്ച വൈദ്യുതി ബന്ധം പുന:സ്ഥാപിച്ചു. വൈദ്യുതി പുന:സ്ഥാപിക്കാന്‍ എത്തിയ ജീവനക്കാര്‍ക്കെതിരെ കൈയേറ്റ ശ്രമം നടത്തുകയും അസഭ്യം പറയുകയും ചെയ്തതോടെ ഉദ്യോഗസ്ഥര്‍ പൊലീസില്‍ പരാതി നല്‍കിയിരുന്നു.
ഇതില്‍ പ്രകോപിതനായ അജ്മലും സഹോദരന്‍ ഷഹദാദും ശനിയാഴ്ച രാവിലെ തിരുവമ്പാടി കെഎസ്ഇബി ഓഫീസിലെത്തി അക്രമം അഴിച്ചുവിടുകയായിരുന്നു. അസിസ്റ്റന്റ് എന്‍ജിനീയര്‍ പ്രശാന്ത് ഉള്‍പ്പെടെയുള്ളവര്‍ക്ക് പരിക്കേറ്റു.യൂത്ത് കോണ്‍ഗ്രസ് മുന്‍ തിരുവമ്പാടി മണ്ഡലം പ്രസിഡന്റായ അജ്മലിനെയും ഷഹദാദിനേയും പൊലീസ് അറസ്റ്റ് ചെയ്തു.
