ന്യൂഡല്‍ഹി: പ്രതിപക്ഷ നേതാവ് രാഹുല്‍ഗാന്ധിയെ ട്രോളി മനോരമ പത്രം. ആദ്യ പ്രസംഗത്തില്‍ തന്നെ ലോക്‌സഭ ഇളക്കി മറിച്ച് പ്രതിപക്ഷ നേതാവ്, രാഹുല്‍ ഷോക്ക് എന്നൊക്കെ ഏഴു കോളും തലക്കെട്ട് കൊടുത്ത് രാഹുലിന്‌റെ ലോക്‌സഭാ പ്രസംഗം വലിയ സംഭവമാണെന്ന് വരുത്തി തീര്‍ക്കാന്‍ പത്രം ശ്രമിച്ചിട്ടുണ്ട്. എന്നാല്‍ അറിയാതെയെങ്കിലും പേജു ചെയ്ത എഡിറ്റര്‍ക്ക് ഉള്ളില്‍ ചിരി പൊട്ടിയിട്ടുണ്ടാവണം. അതിനാലാവണം അറിയാതെ ഒരു കുസൃതി തലക്കെട്ടില്‍ കടന്നുകൂടിയത് . രാഹുല്‍ ഷോക്ക് എന്നാണ് പ്രധാന തലക്കെട്ട്. മോദിക്കും ബിജെപിയ്‌ക്കും രാഹുല്‍ കടുത്ത ഷോക്കേല്‍പ്പിച്ചു എന്ന് അര്‍ത്ഥമാക്കുന്ന തലക്കെട്ട്. എന്നാല്‍ അതില്‍ ഷോക്കിന്‌റെ ക്ക് എന്ന അക്ഷരം ടിന്‌റില്‍ നല്‍കിയാണ് തലക്കെട്ട് രൂപപ്പെടുത്തിയിരിക്കുന്നത്. ഫലത്തില്‍ രാഹുല്‍ ഷോക്ക് എന്നത് രാഹുല്‍ ഷോ എന്നാക്കി പേജ് എഡിറ്റര്‍ ചുരുക്കി. പ്രതിപക്ഷ നേതാവിന്‌റേത് വെറുമൊരു ഷോ മാത്രമാണെന്നും വലിയ കഴമ്പില്ലെന്നുമുള്ള അര്‍ത്ഥത്തിലേക്ക് തലക്കെട്ട് ചുരുങ്ങി. അറിയാതെ ചെയ്തു വച്ചതെങ്കിലും അത് മറ്റൊരുതരത്തില്‍ അര്‍ത്ഥവത്താവുകയും ചെയ്തു. അങ്ങിനെ അത് ഈ സീസണില്‍ മലയാള മനോരമ പോലുള്ള ഒരു കോണ്‍ഗ്രസ് പത്രത്തിന് രാഹുല്‍ ഗാന്ധിക്ക് നല്‍കാവുന്ന ഏറ്റവും വലിയ ട്രോള്‍ ആയി പരിണമിക്കുകയും ചെയ്തു.
ബിജെപിക്കെതിരായ വിമോചനസമരത്തിന് കൊട്ടേഷന്‍ എടുത്തിരിക്കുന്ന മട്ടിലാണ് ഈ സര്‍ക്കാര്‍ അധികാരമേറ്റ നാള്‍ മുതല്‍ ന്യൂഡല്‍ഹിയില്‍ നിന്ന് മനോരമ വാര്‍ത്തകള്‍ നല്‍കിക്കൊണ്ടിരിക്കുന്നത്. ബിജെപിയെ അപ്പാടെ പിടിച്ചു കുലുക്കിയെന്നവകാശപ്പെട്ട് രാഹുല്‍ ഗാന്ധിയുടെ ലോക്‌സഭയിലെ പ്രസംഗം എഡിറ്റോറിയല്‍ പേജില്‍ പൂര്‍ണ്ണരൂപത്തില്‍ പ്രസിദ്ധീകരിച്ചിട്ടുമുണ്ട്.
ഏതായാലും എഡിറ്റോറിയല്‍ മീറ്റിങ്ങില്‍ രാഹുല്‍ ഷോക്ക് എന്ന തലക്കെട്ട് നിശ്ചയിക്കുകയും പിന്നീടത് രാഹുല്‍ ഷോ ആയി മാറുകയും ചെയ്തത് സോഷ്യല്‍ മീഡിയയിലും ചര്‍ച്ച വിഷയമായി.
