തിരുവനന്തപുരം : കളിയിക്കാവിളയില് ക്വാറി ഉടമ ദീപുവിനെ കൊലപ്പെടുത്തിയ കേസിലെ സൂത്രധാരന് അറസ്റ്റിലായ ഗുണ്ടാ നേതാവ് ചൂഴാറ്റുകോട്ട അമ്പിളി(സജികുമാര്) തന്നെയെന്ന് പൊലീസ്.രണ്ട് മാസം മുമ്പാണ് ആസൂത്രണം തുടങ്ങിയത് .
കൊലയ്ക്ക് ശേഷം ചൂഴാറ്റുകോട്ട അമ്പിളി ആദ്യം പോയത് മരിച്ച ദീപുവിന്റെ വീട്ടില് മരണാനന്തര ചടങ്ങുകള്ക്ക് നേതൃത്വം നല്കാനെന്നും പൊലീസ് കണ്ടെത്തി. കസ്റ്റഡിയിലെടുത്ത പൂവാര് പൂങ്കുളം സ്വദേശി പ്രദീപ് കുമാറിന്റെ അറസ്റ്റ് രേഖപ്പെടുത്തും
പ്രദീപ് കുമാറിനെ ചോദ്യം ചെയ്തതില് നിന്നാണ് പൊലീസിന് നിര്ണായക വിവരം കിട്ടിയത്. മെഡിക്കല് ഉപകരണങ്ങളുടെ വിതരണക്കാരനായ പാറശാല സ്വദേശി സുനില് നല്കിയ ക്വട്ടേഷന് എന്നായിരുന്നു അറസ്റ്റിലായപ്പോള് ചൂഴാറ്റുകോട്ട അമ്പിളി പറഞ്ഞത്. എന്നാല് ആസൂത്രണം സജി ഒറ്റയ്ക്കാണ് നടത്തിയതെന്നാണ് പ്രദീപ്കുമാര് നല്കിയ മൊഴി.ദീപുവിനെ കൊലപ്പെടുത്തുന്ന കാര്യം രണ്ട് മാസം മുമ്പ് മദ്യപാന സദസിനിടെ ചൂഴാറ്റുകോട്ട അമ്പിളി തന്നോട് പറഞ്ഞതായി പ്രദീപ് കുമാര് പൊലീസിനോട് വെളിപ്പെടുത്തി.
കൊലപാതകത്തിന് ദിവസങ്ങള്ക്ക് മുമ്പ് സര്ജിക്കല് ബ്ലേഡും ക്ലോറോഫോമും അടക്കം വേണമെന്ന് ചൂഴാറ്റുകോട്ട അമ്പിളിയാണ് സുനിലിനോട് ആവശ്യപ്പെട്ടത്. ദീപു പണവുമായി ജെസിബി വാങ്ങാന് പോകുന്ന ദിവസം ചൂഴാറ്റുകോട്ട അമ്പിളിയെ അമരവിളയില് എത്തിച്ചത് സുനിലും പ്രദീപ് ചന്ദ്രനും ചേര്ന്നാണ് . ഈ യാത്രയില് വച്ചാണ് ആരെ കൊലപ്പെടുത്താന് പോകുന്നെന്ന വിവരം പറഞ്ഞത്.
കൊലപാതകത്തിന് ശേഷം ചൂഴാറ്റുകോട്ട അമ്പിളി മലയത്തെ വീട്ടിലെത്തി. അവിടുന്ന് നേരെ മരിച്ച ദീപുവിന്റെ വീട്ടില് പോയി. മരണാനന്തര ചടങ്ങില് പങ്കെടുക്കുകയും കുടുംബത്തെ ആശ്വസിപ്പിക്കുകയും ചെയ്തു.എന്നാല് പൊലീസ് അന്വേഷണം തന്റെ നേര്ക്ക് തിരിയുന്നത് മനസിലാക്കി ഇയാള് മുങ്ങി. ചൂഴാറ്റുകോട്ട അമ്പിളിയുടെ വീട്ടില് നിന്നും പൊലീസ് ഏഴര ലക്ഷം രൂപ കണ്ടെത്തിയിരുന്നു. ബാക്കി പണം കണ്ടെത്താന് പൊലീസ് അന്വേഷണം തുടരുകയാണ്. സുനിലിനായും പൊലീസ് അന്വേഷണം നടക്കുന്നു. അതിനിടെ സുനിലുമായി അടുപ്പമുള്ള , പാറശാലയില് സര്വീസ് സ്റ്റേഷന് നടത്തുന്ന മണികണ്ഠനെ തമിഴ്നാട് പ്രത്യേക അന്വേഷണസംഘം കസ്റ്റഡിയില് എടുത്തു.
