ലക്‌നൗ : ബക്രീദ് ആഘോഷങ്ങളോടനുബന്ധിച്ച് നിയന്ത്രണങ്ങളുമായി ഉത്തര്‍പ്രദേശിലെ യോഗി ആദിത്യനാഥ് സര്‍ക്കാര്‍. തെരുവുകളില്‍ നമസ്‌കാരം നടത്തുന്നത് നിരോധിച്ചു. ഗതാഗതം തടഞ്ഞ് നമസ്‌കാരം പാടില്ല.
അനുമതി ഇല്ലാത്ത സ്ഥലങ്ങളില്‍ മൃഗങ്ങളെ കശാപ്പ് നടത്തുന്നതും നിരോധിച്ചു.
വിലക്കപ്പെട്ട മൃഗങ്ങളെ ആരെങ്കിലും കശാപ്പ് ചെയ്താല്‍ കര്‍ശന നടപടി സ്വീകരിക്കുമെന്നും സര്‍ക്കാര്‍ അറിയിച്ചു.
അനിഷ്ട സംഭവങ്ങള്‍ ഉണ്ടാകാതിരിക്കാനാണ് ഈ ഉത്തരവ്. പ്രശ്‌ന ബാധിത മേഖലകളില്‍ കൂടുതല്‍ പൊലീസിനെ വിന്യസിച്ചിട്ടുണ്ട്. സംഘര്‍ഷം ഉണ്ടാക്കാന്‍ ശ്രമിക്കുന്നവര്‍ക്കെതിരെ കടുത്ത നടപടി സ്വീകരിക്കണമെന്നും പൊലീസിന് സര്‍ക്കാര്‍ നിര്‍ദേശം നല്‍കി.
ബക്രീദ് ദിനത്തില്‍ ബലിനല്‍കുന്ന സ്ഥലം മുന്‍കൂട്ടി നിശ്ചയിക്കണം.ഇതല്ലാതെ മറ്റ് സ്ഥലങ്ങളില്‍ ബലിതര്‍പ്പണം പാടില്ല. മൃഗബലിക്ക് ശേഷം മാലിന്യ നിര്‍മാര്‍ജനം കൃത്യമായി നടത്തണം. 17നാണ് മുസ്ലിങ്ങള്‍ ബക്രീദ് ആഘോഷിക്കുന്നത്. 16ന് ഗംഗ ദസറ ആഘോഷവും നടക്കും. ഗംഗ ദസറയ്‌ക്കുള്ള ഒരുക്കങ്ങളുടെ ഭാഗമായി ശനിയാഴ്ച മുതല്‍ ഈ മാസം 22 വരെ സംസ്ഥാനത്ത് ശുചീകരണ യജ്ഞം നടത്തണമെന്ന് സര്‍ക്കാര്‍ ഉത്തരവിട്ടു.
