തിരുവനന്തപുരം: ഡ്രൈവിംഗ് ടെസ്റ്റിന് അപേക്ഷകര് എത്തുമ്പോള് ഇന്സ്ട്രക്ടര്മാര് നിര്ബന്ധമാണെന്ന പുതിയ നിബന്ധന മോട്ടോര് വാഹന വകുപ്പ് പുറത്തിറക്കിയതോടെ ഡ്രൈവിംഗ് ടെസ്റ്റ് നടത്തുന്നതില് വീണ്ടും പ്രതിസന്ധി. തിരുവനന്തപുരത്ത് മുട്ടത്തറയില് പ്രതിഷേധം മൂലം ടെസ്റ്റ് തടസപ്പെട്ടു.
ഡ്രൈവിംഗ് സ്കൂള് ലൈസന്സ് നല്കുന്നത് നിശ്ചിത യോഗ്യതയുള്ള ഇന്സ്ട്രക്ടര്മാര്ക്കാണ്.എന്നാല് പലയിടത്തും ലൈസന്സ് ലഭിക്കുന്ന ആളല്ല പഠിപ്പിക്കുന്നത് എന്നാണ് മോട്ടോര് വാഹന വകുപ്പിന്റെ കണ്ടെത്തല്. ഈ സാഹചര്യത്തില് ഇന്സ്ട്രക്ടര്മാരുടെ സാന്നിധ്യം നിര്ബന്ധമാണെന്ന് മോട്ടോര് വാഹന വകുപ്പ് സര്ക്കുലര് ഇറക്കി.
മുട്ടത്തറയില് ടെസ്റ്റിനെത്തിയപ്പോള് ഇന്സ്ട്രക്ടര്മാരുള്ളവര്ക്ക് മാത്രമേ ടെസ്റ്റില് പങ്കെടുക്കാന് അനുമതിയുളളൂവെന്ന് മോട്ടോര് വെഹിക്കിള് ഇന്സ്പെക്ടര്മാര് അറിയിച്ചു. ഇതോടെ പ്രതിഷേധം തുടങ്ങി. ഇന്സ്ട്രക്ടര്മാരുമായി വന്ന ഡ്രൈവിംഗ് സ്കൂളുകള്ക്ക് പോലും ടെസ്റ്റില് പങ്കെടുക്കാനായില്ല.
എന്നാല് വര്ഷങ്ങളായി ഡ്രൈവിംഗ് സ്കൂള് നടത്തുന്നവര്ക്ക് ഡ്രൈവിംഗ് പഠിപ്പിക്കാനായി സര്ക്കാര് പ്രത്യേക തിരിച്ചറിയല് കാര്ഡ് നല്കിയിട്ടുണ്ടെന്നും ഇതുപോലും ഇപ്പോള് ബാധമകല്ലെന്നാണ് പറയുന്നതെന്നുമാണ് ഡ്രൈവിംഗ് സ്കൂള് ഉടമകളുടെ ആരോപണം. ഡ്രൈവിംഗ് സ്കൂള് നടത്തിപ്പ് ചില കുത്തകള്ക്ക് കൈമാറാനാണ് സര്ക്കാര് നീക്കമെന്നാണ് ആക്ഷേപം.
സ്വന്തം വാഹനവുമായി ടെസ്റ്റിനെത്തുന്നവര്ക്ക് ഇന്സ്ട്രക്ടര്മാരുടെ സാന്നിധ്യം ബാധകമല്ല. ഡ്രൈവിംഗ് സ്കൂളുകള്ക്ക് മാത്രം ഇന്സ്ട്രക്ര് ബാധകമാക്കുന്നത് ഇരട്ടത്താപ്പെന്നാണ് വിമര്ശനം.
