തൃശൂര്: കെ.എസ്.ആര്.ടി.സി ബസ് യാത്രയ്ക്കിടെ യുവതി പ്രസവിച്ചു. തിരുനാവായ മണ്ട്രോ വീട്ടില് ലിജീഷിന്റെ ഭാര്യ സെറീന(37) യാണ് തൃശൂരില് നിന്നും തൊട്ടില്പാലം വരെ പോകുന്ന ഫാസ്റ്റ് പാസഞ്ചര് ബസില് പെണ്കുഞ്ഞിന് ജന്മം നല്കിയത്.
തിരുനാവായിലേക്ക് പോകുകയായിരുന്ന സെറീനയ്ക്ക് പേരാമംഗലത്ത് എത്തിയപ്പോഴേക്കും പ്രസവ വേദന അനുഭവപ്പെട്ടു. തുടര്ന്ന് അമല ആശുപത്രിയിലേക്ക് ബസ് തിരിച്ചുവിട്ടു. എന്നാല് ബസ് ആശുപത്രിയില് എത്തുമ്പോഴേക്കും ഏതാണ്ട് പ്രസവം നടന്ന അവസ്ഥയിലായിരുന്നു.
ആശുപത്രിയില് ബസ് എത്തിച്ചതിന് പിന്നാലെ ബസിലേക്ക് കയറിയ ഡോക്ടറും നഴ്സും ബസില് വച്ചു തന്നെ പ്രസവമെടുത്തു. അമ്മയും കുഞ്ഞും ആശുപത്രിയില് സുഖമായിരിക്കുന്നെന്ന് ആശുപത്രി അധികൃതര് വ്യക്തമാക്കി.
