തിരുവനന്തപുരം : മദ്യനയത്തില്‍ ഇളവിനായി കോഴ നല്‍കാന്‍ പണപ്പിരിവ് നടത്തണമെന്ന ബാര്‍ ഉടമകളുടെ സംഘടന ഭാരവാഹിയുടെ ശബ്ദസന്ദേശം സംബന്ധിച്ച് ക്രൈംബ്രാഞ്ച് അന്വേഷിച്ചേക്കും.ഈ വിഷയത്തില്‍ മന്ത്രി എം ബി രാജേഷിന്റെ പരാതി ക്രൈംബ്രാഞ്ച് എ.ഡിജി.പിക്ക് കൈമാറി. പണപ്പിരിവ് ആരോപണത്തിന് പിന്നിലെ ഗൂഡാലോചന അന്വേഷിക്കണമെന്നായിരുന്നു ആവശ്യം.
അന്വേഷണ രീതി ക്രൈംബ്രാഞ്ച് മേധാവി തീരുമാനിക്കും.മദ്യനയ ഇളവിന് കോഴ ആവശ്യപ്പെട്ടുകൊണ്ടുള്ള സംഘടനാ വൈസ് പ്രസിഡന്റും ഇടുക്കി ജില്ലാ പ്രസിഡന്റുമായ അനിമോന്റെ ശബ്ദസന്ദേശമാണ് പുറത്തായത്. പിന്നാലെ രൂക്ഷ വിമര്‍ശനവുമായി പ്രതിപക്ഷം രംഗത്തെത്തി.എക്‌സൈസ് മന്ത്രി രാജിവയ്‌ക്കണമെന്നാണ് പ്രതിപക്ഷത്തിന്റെ ആവശ്യം.
എന്നാല്‍ ആരോപണങ്ങള്‍ തളളിയ സി പി എം പരാതി വ്യാജമാണെന്നും മന്ത്രിയുടെ രാജി ആവശ്യമില്ലെന്നും വ്യക്തമാക്കി.
മദ്യനയ ഇളവിനായി ബാറുടമകള്‍ രണ്ടര ലക്ഷം രൂപ വീതം നല്‍കണമെന്നാണ് ശബ്ദ സന്ദേശത്തിലുളളത്. രണ്ട് ദിവസത്തിനുള്ളില്‍ പണം നല്‍കണമെന്നും സംസ്ഥാന പ്രസിഡന്റിന്റെ നിര്‍ദേശം അനുസരിച്ചാണ് പണപ്പിരിവെന്നുമാണ് അനിമോന്‍ പറയുന്നത്. ഡ്രൈഡേ ഒഴിവാക്കാനും മറ്റ് ഇളവുകള്‍ക്കും പണം കൊടുക്കണമെന്ന് ശബ്ദസന്ദേശത്തില്‍ പറയുന്നു. ഇത് നല്‍കാതെ ആരും സഹായിക്കില്ലെന്നും അനിമോന്‍ പറയുന്നുണ്ട്.
