പാലക്കാട്: സ്വകാര്യ ധനകാര്യ സ്ഥാപനങ്ങളുടെ ഭീഷണിയെ തുടര്ന്ന് ഗൃഹനാഥന് ജീവനൊടുക്കി. കണ്ണാടി കിണാശ്ശേരി ഉപ്പുംപാടം തോട്ടത്ത്കാട് വീട്ടില് പരേതരായ കണ്ടന്റെയും ചെല്ലയുടെയും മകന് ശിവദാസന് (49) ആണ് വീട്ടില് തൂങ്ങിമരിച്ചത്. രാവിലെ 11 മണിയോടെയാണ് സംഭവം.
പല സ്വകാര്യ ധനകാര്യ സ്ഥാപനങ്ങളില് നിന്നും ശിവദാസന് വായ്പയെടുത്തിരുന്നു. തിരിച്ചടവ് മുടങ്ങിയെന്ന് പറഞ്ഞ് ഏജന്റുമാര് നിരന്തരം ഭീഷണിപ്പെടുത്തിയിരുന്നതായി പറയുന്നു. ഇന്നലെ രാവിലെയും ഏജന്റുമാര് വീട്ടിലെത്തി പ്രശ്നമുണ്ടാക്കിയിരുന്നു.
പണം തിരിച്ചടയ്ക്കാമെന്നും ഇതിന് കുറച്ചുസമയം വേണമെന്നും ശിവദാസന്റെ സഹോദരന് ആവശ്യപ്പെട്ടിരുന്നു. എന്നാല് സമയം അനുവദിക്കാതെ രാവിലെയും വീട്ടിലെത്തി ഭീഷണിപ്പെടുത്തിയതില് മനംനൊന്താണ് ശിവദാസന് ജീവനൊടുക്കിയതെന്ന് ബന്ധുക്കള് പറഞ്ഞു.
ഭാര്യയെ ബന്ധുവീട്ടില് വിട്ട ശേഷമാണ് തൂങ്ങിമരിച്ചത്. ശിവദാസനും ഭാര്യ സുനിതയും പാലക്കാട് ഗവ. മെഡിക്കല് കോളജില് കാന്റീന് നടത്തുകയാണ്. മക്കള്: ശില്പ, സുബിന്. സഹോദരങ്ങള്: ആനന്ദന്, ദൈവാനി, വള്ളി. സംഭവത്തില് പോലീസ് കേസെടുത്തു. മൃതദേഹം ജില്ലാ ആശുപത്രിയില് പോസ്റ്റുമോര്ട്ടത്തിന് ശേഷം ബന്ധുക്കള്ക്ക് വിട്ടുനല്കി. നാളെ രാവിലെ 9ന് ചന്ദ്രനഗര് വൈദ്യുതി ശ്മശാനത്തില്.
