ന്യൂദല്‍ഹി:പ്രതിരോധ മന്ത്രാലയത്തിലെ ഉന്നത ഉദ്യോഗസ്ഥ വീട്ടില്‍ മരിച്ച നിലയില്‍. അസിസ്റ്റന്റ് സെക്ഷന്‍ ഓഫീസര്‍ നസിയ ഖാനം (30) ആണ് മരിച്ചത്. മൂന്ന് മാസം ഗര്‍ഭിണിയായിരുന്നു. ദല്‍ഹി ദ്വാരകയിലെ വീട്ടില്‍ മരിച്ച നിലയിലാണ് ഇവരെ കണ്ടെത്തിയത്.
കഴിഞ്ഞ ഏപ്രിലില്‍ വിവാഹിതയായ നസിയയുടെ ഭര്‍ത്താവ് അസം അലി ഖാന്‍ ആണ്.വിവാഹത്തിന് പിന്നാലെ ഭര്‍ത്താവും ഭര്‍തൃമാതാവായ സമീം നിഷയും ഭര്‍തൃപിതാവായ ബാബര്‍ അലി ഖാനും നസിയ ഖാന നിരന്തരം മര്‍ദ്ദിച്ചിരുന്നതായും അധിക്ഷേപിച്ചിരുന്നതായും യുവതിയുടെ വീട്ടുകാര്‍ ആരോപിച്ചു. പുറത്താക്കുമെന്നും കൊല്ലുമെന്നും ഭീഷണിപ്പെടുത്തിയിരുന്നതായും നസിയ പറഞ്ഞിട്ടുള്ളതായി കുടുംബം ആരോപിക്കുന്നു.
ആഗസ്റ്റ് 21ന് പുലര്‍ച്ചെ നാല് മണിയോടെ ആണ് നസിയ ജീവനൊടുക്കിയെന്ന് അസം അലിയുടെ വീട്ടുകാര്‍ വിളിച്ചറിയിച്ചതായി കുടുംബാംഗങ്ങള്‍ പറയുന്നു. മകളെ ഭര്‍തൃവീട്ടുകാര്‍ കൊലപ്പെടുത്തിയതാണെന്നാരോപിച്ച നസിയയുടെ പിതാവ് തവാബ് ഖാന്‍, അസം അലിക്കെതിരെ നിയമനടപടി സ്വീകരിക്കണമെന്നും ആവശ്യപ്പെട്ടു.
സംഭവദിവസം ഇരുവരും തമ്മില്‍ വഴക്കുണ്ടായി. പിന്നാലെ നസിയ മുറിയില്‍ കയറി വാതിലടയ്‌ക്കുകയായിരുന്നുവെന്നുമാണ് അസം അലി പൊലീസിന് മൊഴി നല്‍കിയത്. പിന്നീട് മുറി ബലമായി തുറന്ന് അകത്തുകയറിയപ്പോള്‍ നസിയ ജനലില്‍ തൂങ്ങിനില്‍ക്കുന്നതാണ് കണ്ടതെന്നും ഇയാള്‍ മൊഴി നല്‍കി.
പോസ്റ്റുമോര്‍ട്ടം റിപ്പോര്‍ട്ടിന്റെയും കുടുംബത്തിന്റെ മൊഴിയുടെയും തെളിവുകളുടെയും അടിസ്ഥാനത്തില്‍ കൂടുതല്‍ നടപടികള്‍ സ്വീകരിക്കുമെന്ന് പൊലീസ് അറിയിച്ചു.
