പത്തനംതിട്ട: പശ്ചിമേഷ്യന് പ്രതിസന്ധിയെ തുടര്ന്ന് അസംസ്കൃത വസ്തുക്കളുടെ ലഭ്യതയിലും വിതരണ ശൃംഖലയിലും ഉണ്ടായ തടസങ്ങള് കണക്കിലെടുത്ത് പുനരുപയോഗ ഊര്ജ്ജ പദ്ധതികള്ക്ക് പുനരുപയോഗ ഊര്ജ്ജ മന്ത്രാലയം നാല് മാസം കൂടി സമയപരിധി നീട്ടി.
2026 ഫെബ്രുവരി 28നോ അതിന് ശേഷമോ പൂര്ത്തിയാക്കേണ്ട പദ്ധതികള്ക്കാണ് ഈ ആനുകൂല്യം ലഭിക്കുക.സോളാര് എനര്ജി കോര്പ്പറേഷന് ഓഫ് ഇന്ത്യ (എസ്.ഇ.സി.ഐ), എന്.ടി.പി.സി, എന്.എച്ച്.പി.സി, എസ്.ജെ.വി.എന് തുടങ്ങിയ കേന്ദ്ര ഏജന്സികള്ക്ക് നിലവിലുള്ള പദ്ധതികളുടെ കാലാവധി നീട്ടി നല്കാനാവും. ഇതിനുപുറമേ ഇക്കാലയളവില് കണക്ടിവിറ്റി-ട്രാന്സ്മിഷന് എന്നിവയുമായി ബന്ധപ്പെട്ട് പിഴ ഈടാക്കരുതെന്നും കേന്ദ്രം സംസ്ഥാനങ്ങളോട് ആവശ്യപ്പെട്ടിട്ടുണ്ട്.നിലവില് 150ല് അധികം പുനരുപയോഗ ഊര്ജ്ജ പദ്ധതികളാണ് ഭാരതത്തില് നടപ്പിലാക്കുന്നത്.
സോളാര് വൈദ്യുതിക്ക് അത്യന്താപേക്ഷിതമായ ഡി.സി.ആര് പാനലുകള്ക്കുള്ള കാലാവധി ഡിസംബര് 31 വരെ നീട്ടിയത് ഈ മേഖലയില് സ്വയംപര്യാപ്തത കൈവരിക്കാന് സഹായിക്കുമെന്ന് സോളാര് ആന്ഡ് കാര്ബണ് കണ്സള്ട്ടന്സി വിദഗ്ധര് ചൂണ്ടിക്കാട്ടുന്നു. സോളാര് പദ്ധതികളില് മൂന്നാം സ്ഥാനത്തുള്ള കേരളത്തിന് കേന്ദ്ര തീരുമാനം വലിയ സാമ്പത്തിക നേട്ടത്തിന് കാരണമാകും.
