ന്യൂഡല്ഹി: ഗ്രാന്ഡ് ചെസ്സ് ടൂറിന്റെ അവസാന പാദത്തില് തകര്പ്പന് പ്രകടനവുമായി ഭാരതത്തിന്റെ യുവ ഗ്രാന്ഡ്മാസ്റ്റര് ആര്. പ്രഗ്നാനന്ദ ഫൈനലില് പ്രവേശിച്ചു. സെമിഫൈനലില് ജര്മ്മനിയുടെ ശക്തനായ താരം വിന്സെന്റ് കീമറെ 19-9 എന്ന കൂറ്റന് സ്കോറിന് അട്ടിമറിച്ചാണ് പ്രഗ്നാനന്ദ കലാശപ്പോരിന് യോഗ്യത നേടിയത്.
ക്ലാസിക്കല് മത്സരങ്ങളിലെ വിജയത്തോടെ ആദ്യ ദിനം തന്നെ 6 പോയിന്റിന്റെ ലീഡ് ഉറപ്പിച്ച പ്രഗ്നാനന്ദ, മത്സരം വേഗതയേറിയ ഫോര്മാറ്റുകളിലേക്ക് മാറിയപ്പോഴും സര്വാധിപത്യം തുടര്ന്നു. റാപ്പിഡ് റൗണ്ടിലെ രണ്ട് മത്സരങ്ങളിലും കീമറെ തോല്പ്പിച്ചതോടെ ഭാരത താരം 17-3 എന്ന നിലയില് അജയ്യമായ ലീഡ് നേടി. തുടര്ന്ന് നടന്ന ആദ്യ ബ്ലിറ്റ്സ് (ആഹശ്വേ) മത്സരവും വിജയിച്ചതോടെ പോയിന്റ് 19 ആക്കി ഫൈനല് ഉറപ്പിച്ചു. ശേഷിച്ച ബ്ലിറ്റ്സ് മത്സരങ്ങളില് കീമര് ജയം കണ്ടെങ്കിലും പ്രഗ്നാനന്ദയുടെ വിജയത്തെ അത് ബാധിച്ചില്ല.
കലാശപ്പോരാട്ടത്തില് അമേരിക്കയുടെ പ്രമുഖ താരവും നിലവിലെ ചാമ്പ്യനുമായ ഫാബിയാനോ കരുവാനയാണ് പ്രഗ്നാനന്ദയുടെ എതിരാളി. മറ്റൊരു സെമിയില് അമേരിക്കയുടെ വെസ്ലി സോയെ 18-9 ന് തോല്പ്പിച്ചാണ് കരുവാന ഫൈനലിലെത്തിയത്. മൂന്നാം സ്ഥാനത്തിനായുള്ള പോരാട്ടത്തില് കീമര് വെസ്ലി സോയെ നേരിടും.
