തൊടുപുഴ : പ്രശസ്ത നാടകനടന്‍ എം സി കട്ടപ്പന എന്നറിയപ്പെടുന്ന കട്ടപ്പന കുന്തളംപാറ മരങ്ങാട്ട് എം.സി. ചാക്കോ(75) അന്തരിച്ചു. വാര്‍ധക്യസഹജമായ അസുഖത്തെത്തുടര്‍ന്ന് വിശ്രമത്തിലായിരുന്നു.
1977ല്‍ ആറ്റിങ്ങല്‍ ദേശാഭിമാനി തിയേറ്റേഴ്‌സിന്റെ ‘പുണ്യതീര്‍ഥം തേടി’ എന്ന പ്രഫഷണല്‍ നാടകത്തിലാണ് ആദ്യം അഭിനയിച്ചത്. തുടര്‍ന്ന് മുപ്പതോളം നാടകങ്ങളിലായി ഏഴായിരത്തോളം വേദികളില്‍ ചമയമിട്ടു.
2007ല്‍ കൊല്ലം അരീനയുടെ ‘ആരും കൊതിക്കുന്ന മണ്ണ്’ എന്ന നാടകത്തിലെ അഭിനയത്തിന് മികച്ച നടനുള്ള സംസ്ഥാന സര്‍ക്കാരിന്റെ അവാര്‍ഡ് കരസ്ഥമാക്കി.
2014ല്‍ കേരള സംഗീത നാടക അക്കാദമിയുടെ അഭിനയശ്രീ പുരസ്‌കാരവും ലഭിച്ചു. കാഴ്ച, പളുങ്ക്, പകല്‍, നായകന്‍, ഒരു യക്ഷിക്കഥ തുടങ്ങിയ സിനിമകളിലും 25ഓളം സീരിയലുകളിലും അഭിനയിച്ചിട്ടുണ്ട്.
സംസ്‌കാരം നാളെ രാവിലെ 10 മണിക്ക് കട്ടപ്പന സെന്റ് ജോര്‍ജ് പള്ളി സെമിത്തേരിയില്‍. എം സി ബോബന്‍(അമൃത ടിവി) മകനാണ്.
