ഫുജൈറ : ഫുജൈറ അന്താരാഷ്‌ട്ര വിമാനത്താവളത്തില്‍ നിന്ന് ഇന്ത്യയുള്‍പ്പെടെ വിവിധ രാജ്യങ്ങളിലേക്ക് പ്രതിദിന വിമാന സര്‍വീസുകള്‍ ആരംഭിക്കുന്നു. ഇന്ത്യയില്‍ ഏതെല്ലാം വിമാനത്താവളിലേക്കാണ് സര്‍വീസ് എന്ന് വ്യക്തമാക്കിയിട്ടില്ലെങ്കിലും കേരളത്തിലേക്ക് സര്‍വീസ് ഉണ്ടായിരിക്കുമെന്നാണ് പ്രതീക്ഷ.
ദുബായില്‍ നിന്ന് ഒരുമണിക്കൂര്‍ സഞ്ചരിച്ചാല്‍ എത്തുന്ന ദൂരത്താണ് ഫുജൈറ എന്നതിനാല്‍ ഇന്ത്യക്കാര്‍ക്ക് ഏറെ ഗുണകരമാകുന്നതാണ് വരാനിരിക്കുന്ന സര്‍വീസുകളെന്നാണ് കരുതുന്നത്. എന്നാല്‍, സര്‍വീസ് തുടങ്ങുന്ന കൃത്യമായ തിയതി ഇപ്പോള്‍ വെളിപ്പെടുത്താനാവില്ലെന്നും വൈകാതെ സര്‍വീസ് തുടങ്ങുമെന്നും ഫുജൈറ വിമാനത്താവള അധികൃതര്‍ പറഞ്ഞു.
ഈ വര്‍ഷം ജൂലായ് 11ന് ഈജിപ്ത് എയര്‍ ഫുജൈറയിലേക്ക് സര്‍വീസ് ആരംഭിക്കും. ഒരു ഇന്ത്യന്‍ എയര്‍ലൈനുമായി അവസാന വട്ട ചര്‍ച്ചയിലാണ്. മറ്റ് എയര്‍ലൈനുകളും താല്‍പര്യം പ്രകടിപ്പിച്ചിട്ടുണ്ടെന്നാണ് റിപ്പോര്‍ട്ട്.
