തിരുവനന്തപുരം: വൈദ്യുതി മേഖലയിലെ തടസ്സങ്ങൾക്ക് പരിഹാരം കാണുന്നതിനും സ്ഥിതിഗതികൾ വിലയിരുത്തുന്നതിനും പ്രത്യേക കൺട്രോൾ റൂം സംവിധാനം സജ്ജമാക്കാനൊരുങ്ങി കെഎസ്ഇബി. ഫീഡറുകളിലെ ഓവർലോഡ്, സബ്സ്റ്റേഷനുകളിലെ ലോഡ് ക്രമീകരണം, വിവിധ സ്ഥലങ്ങളിൽ വ്യത്യസ്ത സമയങ്ങളിലെ വൈദ്യുതി ആവശ്യകത, ഇവയുടെ കൃത്യമായ ലഭ്യത, ഇവ തമ്മിലുള്ള അന്തരം എന്നീ കാര്യങ്ങൾ ഏകോപിപ്പിക്കുക തുടങ്ങിയ ലക്ഷ്യങ്ങളാണ് കെഎസ്ഇബി വയ്ക്കുന്നത്. തിരുവനന്തപുരം വൈദ്യുതി ഭവനിലാണ് കൺട്രോൾ റൂം സംവിധാനം പ്രവർത്തിക്കുകയെന്നും കെഎസ്ഇബി വ്യക്തമാക്കി.
കെഎസ്ഇബി അറിയിപ്പ്:
സംസ്ഥാനത്ത് കനത്ത ചൂടിനേയും ഉഷ്ണക്കാറ്റിനേയും തുടർന്ന് വൈദ്യുതി മേഖലയ്ക്കുണ്ടാകുന്ന തടസ്സം പരിഹരിക്കുന്നതിനും സ്ഥിതിഗതികൾ സംസ്ഥാനമൊട്ടാകെ ഏകോപിപ്പിക്കുന്നതിനും കെ.എസ്.ഇ.ബി. പ്രത്യേകം കൺട്രോൾ റൂം സംവിധാനം ഏർപ്പെടുത്തി. ഫീഡറുകളിലെ ഓവർലോഡ്, സബ്സ്റ്റേഷനുകളിലെ ലോഡ് ക്രമീകരണം, വിവിധ സ്ഥലങ്ങളിൽ വ്യത്യസ്ത സമയങ്ങളിലെ വൈദ്യുതി ആവശ്യകതയും ലഭ്യതയും തമ്മിലുള്ള അന്തരം തുടങ്ങി നിരവധി കാര്യങ്ങൾ ഏകോപിപ്പിക്കുക ലക്ഷ്യമാക്കിയാണ് കൺട്രോൾ റൂം പ്രവർത്തിക്കുക. തിരുവനന്തപുരത്ത് വൈദ്യുതി ഭവനിലാണ് കൺട്രോൾ റൂം സംവിധാനം.
പീക്ക് സമയത്ത് വൈദ്യുതി മേഖലയിലെ പ്രസരണ വിതരണ സംവിധാനം ഒരു പരിധിവരെ പിടിച്ചു നിർത്തുക എന്നത് ലക്ഷ്യമാക്കിയാണ് കൺട്രോൾ റൂം പ്രവർത്തിക്കുക. പ്രസരണം, വിതരണം, ലോഡ് ഡെസ്പാച്ച് സെന്റർ എന്നീ മേഖലകളിലെ ഉദ്യോഗസ്ഥൻമാരാണ് കൺട്രോൾ റൂമിലുള്ളത്. അവശ്യസന്ദർഭങ്ങളിൽ തൽസമയം വേണ്ട തീരുമാനമെടുക്കുവാൻ കൺട്രോൾ റൂമിന് സാധിക്കുന്നതാണ്. വിവിധ പ്രേദേശങ്ങൾ വൈദ്യുതിയുടെ ലോഡ് മാനേജ്മെന്റ് നടത്തുന്നതിനും ഓരോ ദിവസത്തെ ലോഡ് വിലയിരുത്തുന്നതിനും കൺട്രോൾ റൂമിന് സാധിക്കും. അനിതര സാധാരണമായ ഇപ്പോഴത്തെ സ്ഥിതിഗതികൾ നിയന്ത്രണാധീനമാകുന്നതുവരെ കൺട്രോൾ റൂം സംവിധാനം തുടരുന്നതായിരിക്കും.
