കൊച്ചി: ആലുവ ശ്രീമൂലനഗരം കൊണ്ടോട്ടിയില് മുന് പഞ്ചായത്ത് അംഗമുള്പ്പെടെ ആറ് പേര്ക്ക് നേരെ ആക്രമണം നടത്തിയ ഗുണ്ടാ സംഘത്തിലെ നാല് പേരെ പൊലീസ് കസ്റ്റഡിയിലെടുത്തു. ആക്രമണത്തില് നേരിട്ട് പങ്കെടുത്ത മൂന്ന് പേരും ഗൂഢാലോചനയില് ഉള്പ്പെട്ട ഒരാളുമാണ് പിടിയിലായത്.
ആക്രമണത്തില് പങ്കെടുത്ത സിറാജ്, സനീര്, ഫൈസല് എന്നിവരും ഗൂഢാലോചനയില് പങ്കുളള കബിറുമാണ് പൊലീസ് കസ്റ്റഡിയിലുളളത്.കൃത്യത്തില് നേരിട്ട് പങ്കെടുത്ത സിറാജിനെ കാക്കനാട് നിന്നും സനീറിനെ അരൂര് നിന്നും ഫൈസല് ബാബുവിനെ തൃശൂര് നിന്നുമാണ് പിടികൂടിയത്. ഗൂഢാലോചനയില് പങ്കെടുത്ത കബീറും കസ്റ്റഡിയിലുണ്ട്.
കഴിഞ്ഞ രാത്രിയാണ് നാടിനെ നടുക്കിയ ആക്രമണമുണ്ടായത്. ദിവസങ്ങള്ക്ക് മുമ്പ് ഒരു വാഹനം തട്ടിയ തര്ക്കത്തെ തുടര്ന്നാണ് ഇന്നലെത്തെ ആക്രമണം. ആയുധങ്ങളുമായി ഗുണ്ടാ സംഘമെത്തുന്നതിന്റെ സിസിടി ദൃശ്യങ്ങള് പുറത്ത് വന്നു. ബൈക്ക് നിര്ത്തി ഒരാള് ഇറങ്ങുന്നതും മുന്നോട്ട് പോയ കാര് തിരികെ വരുന്നതും അതില് നിന്നും ആയുധങ്ങളുമായി സംഘം ഇറങ്ങുന്നതും സിസിടിവി ദൃശ്യത്തില് കാണാം.
രാത്രി പത്ത് മണിയോടെയാണ് കാറിലെത്തിയ ആറംഗ സംഘം ചുറ്റികയും വാളും ഇരുമ്പ് വടിയും കൊണ്ട് ആക്രമണം നടത്തിയത്. ആക്രമണത്തില് കോണ്ഗ്രസ് പ്രവര്ത്തകനും മുന് പഞ്ചായത്ത് അംഗവുമായ പി സുലൈമാന് ഗുരുതര പരിക്കേറ്റു.ഇദ്ദേഹം വെന്റിലേറ്ററിലാണ്. സുലൈമാനോടൊപ്പം ഉണ്ടായാരുന്ന മറ്റ് നാല് പേര്ക്കും പരിക്കേറ്റു.
പ്രദേശത്ത് ദിവസങ്ങള്ക്ക് മുമ്പ് വാഹനം തട്ടിയതുമായി ബന്ധപ്പെട്ട് വാക്കു തര്ക്കവും പൊലീസ് കേസുമുണ്ടായിരുന്നു.ഇതിന്റെ പ്രശ്ന പരിഹാരത്തിന് ഇടപെട്ടവരാണ് ഇപ്പോള് ആക്രമിക്കപ്പെട്ട സുലൈമാനുള്പ്പെടെയുളളവര്.
