ന്യൂദല്‍ഹി: കേന്ദ്ര ആഭ്യന്തര മന്ത്രി അമിത് ഷാ സഞ്ചരിച്ച ഹെലികോപ്റ്റര്‍ പറന്നുയരുന്നതിനിടെ നിയന്ത്രണം നഷ്ടമായെന്ന വാര്‍ത്ത നിഷേധിച്ച് കേന്ദ്ര സര്‍ക്കാര്‍. അത്തരത്തില്‍ അപകടങ്ങളൊന്നും ഉണ്ടായിട്ടില്ലെന്ന് സര്‍ക്കാര്‍ വൃത്തങ്ങള്‍ വ്യക്തമാക്കി.
ഇന്നലെ ബിഹാറിലെ ബേഗുസരായില്‍ നിന്ന് പറന്നുയരുന്നതിനിടെ അല്‍പ്പനേരം ഹെലികോപ്്റ്ററിന്റെ നിയന്ത്രണം നഷ്ടമായെന്ന തരത്തിലുള്ള വീഡിയോ ദൃശ്യങ്ങള്‍ സാമൂഹ്യ മാധ്യമങ്ങളിലൂടെ പ്രചരിച്ചിരുന്നു. ഇതേ തുടര്‍ന്നാണ് കേന്ദ്ര സര്‍ക്കാര്‍ തന്നെ വിശദീകരണം ഇറക്കിയത്. പറന്നുയരുന്നതിനിടെ ഹെലികോപ്റ്റര്‍ അല്‍പ്പം ചെരിയുന്നതായാണ് വീഡിയോയിലുണ്ടായിരുന്നത്. എന്നാല്‍ തൊട്ടടുത്ത സെക്കന്‍ഡില്‍ തന്നെ നിയന്ത്രണം വീണ്ടെടുത്ത് ഹെലികോപ്റ്റര്‍ പറന്നുയരുകയും ചെയ്തിരുന്നു.
