ന്യൂദല്ഹി: വിദേശത്ത് ജോലി വാഗ്ദാനം ചെയ്ത് നാലു കോടിയോളം രൂപയുടെ തട്ടിപ്പ് നടത്തിയ സംഭവത്തിലെ മുഖ്യപ്രതിയെ ദല്ഹി പോലീസ് പിടികൂടി. സംഘത്തിന്റെ സൂത്രധാരയായ യുവതിയെ ദല്ഹി പോലീസിന്റെ എക്കണോമിക് ഒഫന്സെസ് വിങ്ങാണ് (ഇഒഡബ്ല്യൂ) അറസ്റ്റുചെയ്തത്. പഞ്ചാബിലെ സിറാക്പൂരിലെ വീട്ടില് നിന്ന് കഴിഞ്ഞ മാസം 25നാണ് ഇവരെ അറസ്റ്റു ചെയ്തത്. കഴിഞ്ഞ എട്ടുമാസമായി തുടരുന്ന തട്ടിപ്പാണ് ഇതോടെ പുറത്തുവന്നത്.
വഞ്ചനാക്കുറ്റം ആരോപിച്ച് തമിഴ്നാട്, ദല്ഹി, രാജസ്ഥാന്, ഉത്തര്പ്രദേശ്, പഞ്ചാബ്, ഹരിയാന എന്നിവിടങ്ങളില് നിന്നായി 23 പേര് നല്കിയ പരാതിയിലാണ് ദല്ഹി പോലീസ് അന്വേഷണം നടത്തിയത്. ഇതിനു പിന്നാലെ തട്ടിപ്പിനിരയായെന്ന് ചൂണ്ടിക്കാട്ടി നേപ്പാളില്നിന്ന് 29 പേര് പരാതി നല്കി. കഴിഞ്ഞ മാര്ച്ചിലാണ് അന്വേഷണം ആരംഭിച്ചത്.
വിദേശജോലി തേടിയെത്തുന്നവരുടെ വിശ്വാസം നേടാനായി സംഘം ആഡംബര സ്ഥലങ്ങള് കേന്ദ്രീകരിച്ചാണ് ഓഫീസ് തുടങ്ങുക. ജോലി തേടി വരുന്നവരുടെ പക്കല്നിന്ന് തുടക്കത്തില് ആദ്യം കുറച്ചു പണം രജിസ്ട്രേഷന് തുകയായി ആവശ്യപ്പെടും. ഇന്സ്റ്റഗ്രാം, ഫെയ്സ്ബുക്ക്, ലിങ്ക്ടിന് തുടങ്ങിയ സാമൂഹ്യമാധ്യമങ്ങള് വഴിയാണ് കമ്പനി ആളുകളെ ആകര്ഷിച്ചിരുന്നത്.
പഞ്ചാബിലെ അമൃത്സറില് നിന്നുള്ള 29 വയസുകാരനായ നിഷാന്ത് സിങ്ങിന് 3.20 ലക്ഷം രൂപയാണ് തട്ടിപ്പ് വഴി നഷ്ടമായത്. സുഹൃത്തിന്റെ നിര്ദേശ പ്രകാരമാണ് ഇയാള് കമ്പനിയിലേക്ക് എത്തിയത്. വളരെ ആധികാരികതയോടെയാണ് ആദ്യ സന്ദര്ശനത്തില് തട്ടിപ്പുസംഘം സംസാരിച്ചതെന്ന് നിഷാന്ത് സിങ് പറയുന്നു.
ഓഫീസിലെത്തിയപ്പോള് മറ്റ് നടപടികളൊക്കെ പൂര്ത്തിയാക്കിയ ശേഷം ജിഎസ്ടി നമ്പര് അടങ്ങിയ സ്ലിപ് നല്കി. രജിസ്ട്രേഷന് ഫീസായി 5900 രൂപയും ബയോമോട്രിക് വിവരങ്ങള് ചേര്ക്കാനായി 20,000 രൂപയും മാത്രമാണ് ആദ്യം വാങ്ങിയത്. എന്നാല്, ഹെല്ത്ത് ഇന്ഷുറന്സിനായി 30,000 രൂപയും, സ്പോണ്സര്ഷിപ്പ് തുകയായി 70,000 രൂപയും വിമാന നിരക്കിന്റെ വകയില് 1.05 ലക്ഷവും പിന്നീട് വാങ്ങുകയായിരുന്നു.
