ആലപ്പുഴ: പൂങ്കാവിൽ അറുപത് വയസുള്ള സഹോദരിയെ സഹോദരൻ കൊന്ന് കുഴിച്ചുമൂടി. പൂങ്കാവ് വടക്കന്പറമ്പില് റോസമ്മയെയാണ് കൊലപ്പെടുത്തി വീടിനുള്ളില് കുഴിച്ചിട്ടത്. സംഭവവുമായി ബന്ധപ്പെട്ട് റോസമ്മയുടെ സഹോദരന് ബെന്നിയെ പോലീസ് കസ്റ്റഡിയിലെടുത്തു. മൃതദേഹം കണ്ടെടുക്കാനായി ഇയാളുമായി പോലീസും റവന്യൂ ഉദ്യോഗസ്ഥരുടെ സംഘവും പൂങ്കാവിലെ വീട്ടിലെത്തുകയും വീടിന് പുറകുവശത്ത് നിന്നും മൃതദേഹം കണ്ടെടുക്കുകയും ചെയ്തു.
പൂങ്കാവ് പള്ളിക്ക് സമീപത്തെ വീട്ടിലാണ് ബെന്നിയും സഹോദരി റോസമ്മയും താമസിച്ചിരുന്നത്. ഇരുവരും തമ്മിലുണ്ടായ തര്ക്കത്തിനിടെ ബെന്നി സഹോദരിയെ കൊലപ്പെടുത്തിയെന്നും തുടര്ന്ന് ദൃശ്യം മോഡലില് മൃതദേഹം വീടിനുള്ളില് കുഴിച്ചിട്ടെന്നുമാണ് സംശയിക്കുന്നത്. റോസമ്മയെ ബുധനാഴ്ച മുതൽ കാണാതാകുകയായിരുന്നു. കയ്യബദ്ധം പറ്റിയെന്ന് ബെന്നി ബന്ധുക്കളോട് പറഞ്ഞതായാണ് വിവരം.
ഇതിന്റെ അടിസ്ഥാനത്തിലാണ് സഹോദരനെ കസ്റ്റഡിയിലെടുത്ത് ചോദ്യം ചെയ്യുന്നത്. റോസമ്മ രണ്ടാം വിവാഹം കഴിക്കാൻ തീരുമാനിച്ചതാണ് കൊലപാതകത്തിന് കാരണമെന്ന് സഹോദരൻ മൊഴി നൽകിയതായാണ് വിവരം.
