ഇനി ഹൈസ്പീഡില്‍: ബുള്ളറ്റ് ട്രെയിന്‍ നിര്‍മാണം ചെന്നൈയില്‍ ആരംഭിച്ചു

ചെന്നൈ: മുംബൈ-അഹമ്മദാബാദ് ഹൈസ്പീഡ് റെയില്‍ പദ്ധതിക്കായുള്ള ബുള്ളറ്റ് ട്രെയിനുകളുടെ നിര്‍മാണം ആരംഭിച്ചതായി റിപ്പോര്‍ട്ട്. ചെന്നൈയിലെ ഇന്റഗ്രല്‍ കോച്ച് ഫാക്ടറിയിലാണ് നിര്‍മാണ പ്രവര്‍ത്തനങ്ങള്‍ പുരോഗമിക്കുന്നത്. ജപ്പാനിലെ ഇ5 ശ്രേണിയിലുള്ള അതിവേഗ ബുള്ളറ്റ് ട്രെയിനുകളുടെ മാതൃകയിലാണ് നിര്‍മാണമെന്നും റെയില്‍വേ അധികൃതര്‍ അറിയിച്ചു.

മണിക്കൂറില്‍ 250 കിലോമീറ്ററിലധികം വേഗത്തില്‍ സഞ്ചരിക്കുന്ന, 52 സെക്കന്‍ഡിനുള്ളില്‍ നൂറു കിലോമീറ്റര്‍ വേഗം കൈവരിക്കാനാകുന്ന ട്രെയിനുകളാണ് നിര്‍മാണത്തിലുള്ളത്. ബുള്ളറ്റ് ട്രെയിനുകള്‍ക്ക് മണിക്കൂറില്‍ പരമാവധി 320 കിലോമീറ്റര്‍ വേഗത്തില്‍ സഞ്ചരിക്കാനാകും. വന്ദേഭാരത് ട്രെയിനുകള്‍ മണിക്കൂറില്‍ പരമാവധി 220 കിലോമീറ്റര്‍ വേഗത്തിലാണ് സഞ്ചരിക്കുന്നത്.

തദ്ദേശീയ സാങ്കേതികവിദ്യയും ആഭ്യന്തരോത്പാദനവും കൂടുതലായി പ്രയോജനപ്പെടുത്തിയാണ് നിര്‍മാണം. ജപ്പാന്റെ സഹകരണവും സാങ്കേതികവിദ്യയും ഉപയോഗിച്ച് വികസിപ്പിച്ചെടുത്ത പടിഞ്ഞാറന്‍ ഇടനാഴിക്ക് ബദലായിട്ടാണ് മറ്റ് മൂന്ന് റെയില്‍വേ ഇടനാഴികളിലും തദ്ദേശീയ സാങ്കേതികവിദ്യ ഉപയോഗിക്കുക. തെക്ക്, വടക്ക്, കിഴക്കന്‍ ഇടനാഴികളിലാവും ബുള്ളറ്റ് ട്രെയിന്‍ പദ്ധതി നടപ്പാക്കുക.

തെക്ക്, വടക്ക്, കിഴക്കന്‍ ഇടനാഴികളിലാവും ബുള്ളറ്റ് ട്രെയിന്‍ പദ്ധതി നടപ്പാക്കുക. മുംബൈ-അഹമ്മദാബാദ് ഹൈസ്പീഡ് റെയില്‍പദ്ധതിക്കായി ജപ്പാന്‍ ഇന്റര്‍നാഷണല്‍ കോ-ഓപ്പറേഷന്‍ ഏജന്‍സി 40,000 കോടി രൂപയാണ് വായ്‌പ നല്കിയത്. മൊത്തം പദ്ധതിച്ചെലവ് 1.08 ലക്ഷം കോടി രൂപയ്‌ക്ക് മുകളിലാണ്.

ബുള്ളറ്റ് ട്രെയിന്‍ പദ്ധതി നടപ്പാക്കുന്ന നാഷണല്‍ ഹൈസ്പീഡ് റെയില്‍ കോര്‍പ്പറേഷന്‍ ലിമിറ്റഡ് (എന്‍എച്ച്എസ്ആര്‍സിഎല്‍) 300 കിലോമീറ്റര്‍ തൂണുകളുടെ പണി പൂര്‍ത്തിയായതായി നേരത്തെ അറിയിച്ചിരുന്നു. 508 കിലോമീറ്റര്‍ ദുരത്തില്‍ സ്ഥലമെടുപ്പും പൂര്‍ത്തിയായി.

മുംബൈ-അഹമ്മദാബാദ് ഇടനാഴിയിലൂടെ രണ്ട് വര്‍ഷത്തിനുള്ളില്‍ ബുള്ളറ്റ് ട്രെയിന്‍ സര്‍വീസ് ആരംഭിക്കുമെന്നാണ് റെയില്‍വേ മന്ത്രി അശ്വിനി വൈഷ്ണവ് വ്യക്തമാക്കിയിരിക്കുന്നത്.