ന്യൂദല്ഹി: ഭാരതത്തിലെ തെരഞ്ഞെടുപ്പിനെ വിദേശ രാജ്യങ്ങളിലെ വോട്ടിങ്ങുമായി താരതമ്യം ചെയ്യരുതെന്ന് സുപ്രീംകോടതി. എന്റെ സ്വന്തം സംസ്ഥാനമായ പശ്ചിമബംഗാളിലെ ജനസംഖ്യ ജര്മനിയിലേതിനേക്കാള് കൂടുതലാണ്. നമ്മള് ആരെയെങ്കിലും വിശ്വസിക്കണം. ഈ വ്യവസ്ഥിതിയെ ഇങ്ങനെ താറടിക്കാന് ശ്രമിക്കരുത്.
അത്തരം ഉദാഹരണങ്ങള് പറയരുത്. യൂറോപ്യന് ഉദാഹരണങ്ങള് നമ്മുടെ രാജ്യത്ത് പ്രാവര്ത്തികമാകില്ലെന്നും ജസ്റ്റിസ് ദീപാങ്കര് ദത്ത കൂട്ടിച്ചേര്ത്തു. സുപ്രീംകോടതിയില് ഇലക്ട്രോണിക് വോട്ടിങ് മെഷീനില് രേഖപ്പെടുത്തിയ വോട്ടുകള് വിവിപാറ്റ് പേപ്പര് സ്ലിപ്പുകള് ഉപയോഗിച്ച് ക്രോസ് വെരിഫിക്കേഷന് ചെയ്യണമെന്ന് ആവശ്യപ്പെട്ട് സമര്പ്പിച്ച ഹര്ജികള് പരിഗണിക്കവേയായിരുന്നു ജസ്റ്റിസിന്റെ പ്രതികരണം.
പേപ്പര് ബാലറ്റിലേക്ക് മടങ്ങിയ ജര്മനിയുടെ ഉദാഹരണം ഹര്ജിക്കാര്ക്ക് വേണ്ടി ഹാജരായ പ്രശാന്ത് ഭൂഷണ് ചൂണ്ടിക്കാട്ടിയപ്പോഴായിരുന്നു ജസ്റ്റിസ് ദീപാങ്കര് ദത്തയുടെ രൂക്ഷമായ പ്രതികരണം. ജര്മനിയിലെ ജനസംഖ്യ എത്രയാണെന്ന് ജസ്റ്റിസ് ചോദിച്ചു. ഇത് ഏകദേശം അഞ്ചു കോടിയാണെന്ന് പ്രശാന്ത് ഭൂഷണ് മറുപടി നല്കി. അപ്പോള് രാജ്യത്ത് 97 കോടിയാണ് രജിസ്റ്റര് ചെയ്ത വോട്ടര്മാരുടെ ആകെ എണ്ണം.
ബാലറ്റ് പേപ്പറുകള് ഉണ്ടായിരുന്നപ്പോള് എന്താണ് സംഭവിച്ചതെന്ന് എല്ലാവര്ക്കും അറിയാമെന്നും ജസ്റ്റിസ് സഞ്ജീവ് ഖന്ന അഭിപ്രായപ്പെട്ടു. ഹര്ജിക്കാരില് ഒരാളുടെ അഭിഭാഷകനായ സഞ്ജയ് ഹെഗ്ഡെ ഇവിഎമ്മുകളില് രേഖപ്പെടുത്തുന്ന വോട്ടുകള് വിവിപാറ്റ് സ്ലിപ്പുകളുമായി താരതമ്യം ചെയ്യണമെന്ന് ആവശ്യപ്പെട്ടു. അപ്പോള് 60 കോടി വിവിപാറ്റ് സ്ലിപ്പുകള് എണ്ണണം. ശരിയാണോ? ജസ്റ്റിസ് ഖന്ന ചോദിച്ചു.
മനുഷ്യന്റെ ഇടപെടലാണ് പ്രശ്നമുണ്ടാക്കുന്നത്. സാധാരണയായി മനുഷ്യ ഇടപെടലില്ലാതെ യന്ത്രം നിങ്ങള്ക്ക് കൃത്യമായ ഫലങ്ങള് നല്കും. മനുഷ്യന്റെ ഇടപെടല് ഉണ്ടാകുമ്പോഴോ, സോഫ്റ്റ്വെയറിലോ മെഷീനിലോ അനധികൃത മാറ്റങ്ങള് വരുത്തുമ്പോഴോ പ്രശ്നം ഉണ്ടാകുന്നു, ഇത് ഒഴിവാക്കാന് എന്തെങ്കിലും നിര്ദേശമുണ്ടെങ്കില്, അത് നല്കാനും ജസ്റ്റിസ് സഞ്ജീവ് ഖന്ന ആവശ്യപ്പെട്ടു.
ഇലക്ട്രോണിക് വോട്ടിങ് മെഷീനില് കൃത്രിമം കാണിക്കുന്നവര്ക്കെതിരെ കര്ശന നടപടി വേണമെന്ന് സുപ്രീംകോടതി നിര്ദേശിച്ചു. അത് ഗൗരവമേറിയ വിഷയമാണ്. വോട്ടിങ് മെഷീനില് കൃത്രിമം നടത്തിയാല് കഠിനമായ ശിക്ഷ കിട്ടുമെന്ന ഭയം വേണമെന്ന് കോടതി അഭിപ്രായപ്പെട്ടു. വോട്ടെടുപ്പ്, ഇവിഎമ്മുകളുടെ സൂക്ഷിക്കല്, വോട്ടെണ്ണല് എന്നിവയെക്കുറിച്ച് വിശദാംശങ്ങള് അറിയിക്കാന് കോടതി തെര. കമ്മിഷനോട് ആവശ്യപ്പെട്ടു.
