പാരിസ്: ഫ്രഞ്ച് ഫുട്ബോളിലെ വമ്പന്മാരായ പാരിസ് സെന്റ് ജെര്മെയ്നെ(പിഎസ്ജി) അവരുടെ സ്വന്തം തട്ടകത്തില് സ്പാനിഷ് ക്ലബ്ബ് എഫ്സി ബാഴ്സിലോണ പരാജയപ്പെടുത്തി. ഇന്നലെ നടന്ന യുവേഫ ചാമ്പ്യന്സ് ലീഗ് ക്വാര്ട്ടര് പോരാട്ടത്തില് രണ്ടിനെതിരെ മൂന്ന് ഗോളുകള് നേടിയാണ് ബാഴ്സ വിജയിച്ചത്.
ബ്രസീല് താരം റഫീഞ്ഞയുടെ ഇരട്ടഗോളാണ് ബാഴ്സയ്ക്ക് തുണയായത്. ആദ്യപകുതിയില് കളിക്ക് 37 മിനിറ്റെത്തിയപ്പോള് റഫീഞ്ഞയിലൂടെ ബാഴ്സ മുന്നിലെത്തി. ഏകപക്ഷീയമായ ഈ ഒരു ഗോളിന്റെ ആധിപത്യത്തില് ആദ്യപകുതിയില് ടീം മുന്നിട്ടുനിന്നു.
രണ്ടാം പകുതിക്ക് പിഎസ്ജി തുടക്കമിട്ടത് രണ്ട് മിനിറ്റിനിടെ രണ്ട് ഗോളുകള് തിരിച്ചടിച്ച് മുന്നിലെത്തിക്കൊണ്ടാണ്. 48-ാം മിനിറ്റില് ഉസ്മാന് ഡെംബേലയും 50-ാം മിനിറ്റില് വിടീഞ്ഞയും ഗോളുകള് നേടി. മുന്നേറ്റം തുടരുന്നതിനിടെ ബാഴ്സ റഫീഞ്ഞയിലൂടെ വീണ്ടും ഗോള് കണ്ടെത്തി. ബ്രസീല് താരത്തിന്റെ ഇരട്ടഗോളോടെ ബാഴ്സ ആതിഥേയര്ക്കൊപ്പമെത്തി. കളിക്ക് 62-ാം മിനിറ്റായപ്പോഴായിരുന്നു ഈ സമനില ഗോള്. 15 മിനിറ്റ് ശേഷം ആന്ദ്രിയാസ് ക്രിസ്റ്റെന്സെനിലൂടെ ബാഴ്സ വിജയഗോള് ആഘോഷിച്ചു. അടുത്ത ചൊവ്വാഴ്ച കാറ്റലോണിയയില് രണ്ടാംപാദ ക്വാര്ട്ടര്.
