പാരീസ്: ഫ്രഞ്ച് ലിഗ് വണില് കിരീട തുടര്ച്ചയ്ക്കായി പാരീസ് സാന്റ് ഷാര്മെയ്ന്(പിഎസ്ജി) ഇനിയൊരു സമനില കൂടി മതിയാകും. ആകെ രണ്ട് മത്സരങ്ങളാണ് ലീഗില് ടീമിന് ബാക്കിയുള്ളത്. ഇന്നലെ ലിഗ് വണ് പോരാട്ടത്തില് ബ്രെസ്റ്റിനെ 1-0ന് തോല്പ്പിച്ചതോടെയാണ് പിഎസ്ജി കിരീടത്തിലേക്ക് കൂടുതല് അടുത്തത്.
സ്വന്തം പാര്ക് ഡെ പ്രിന്സസ് സ്റ്റേഡിയത്തില് ബ്രെസ്റ്റിനെതിരെ രണ്ടാം പകുതിയിലാണ് പിഎസ്ജി വിജയഗോള് നേടിയത്. മത്സരത്തിന്റെ 82-ാം മിനിറ്റില് ഡിസൈര് ഡ്യൂ ആണ് സ്കോര് ചെയ്തത്. സീസണില് യുവേഫ ചാമ്പ്യന്സ് ലീഗ് ഫൈനലിലേക്ക് തുടര്ച്ചയായി രണ്ടാം തവണയും മുന്നേറിയ പിഎസ്ജി ഫ്രഞ്ച് ലീഗില് നല്ല വെല്ലുവിളി നേരിട്ടു. യൂറോപ്പിലെ പ്രധാന നാല് ലീഗുകളില് ഒന്നായ ഫ്രഞ്ച് ലിഗ് വണില് ഏതാനും വര്ഷങ്ങളായി പിഎസ്ജി അഞ്ചോളം മത്സരങ്ങള് ബാക്കിയുള്ളപ്പോള് ലീഗ് ടൈറ്റില് ഉറപ്പിക്കാറുണ്ട്. പക്ഷെ ഇക്കുറി അവസാന കളിയിലേക്ക് എന്നോണം നീണ്ടുപോയിരിക്കുന്നു.
പിഎസ്ജിയുടെ അടുത്ത രണ്ട് കളികളില് ഒന്ന് നാളെ ലെന്സിനെതിരെയാണ്. ലിഗ് വണ് പോയിന്റ് പട്ടികയില് പിഎസ്ജിക്ക് തൊട്ടുതാഴെയുള്ള ടീം ആണ് ലെന്സ്. ആറ് പോയിന്റ് വ്യത്യാസമാണ് ഇരു ടീമുകളും തമ്മില് നിലനില്ക്കുന്നത്. പിഎസ്ജിയുടെ രണ്ടാം മത്സരം പാരിസ് എഫ്സിക്കെതിരെയാണ്. ഈ രണ്ട് മത്സരങ്ങളില് നിന്ന് ഒരു സമനിലയെങ്കിലും നേടിയാല് പിഎസ്ജിക്ക് ടൈറ്റില് ഉറപ്പിക്കാം. അതേ സമയം രണ്ടും തോല്ക്കുകയും ലെന്സ് അവസാന കളിയില് ജയിക്കുകയും ചെയ്താല് ടൈബ്രേക്കറിലേക്ക് ലീഗ് എത്തിനില്ക്കും.
