ന്യൂദല്‍ഹി: കോടികളുടെ മദ്യനയ അഴിമതിക്കേസില്‍ മുഖ്യമന്ത്രി അരവിന്ദ് കേജ്‌രിവാള്‍ തിഹാര്‍ ജയിലിലായതോടെ ദല്‍ഹിയില്‍ ഭരണ പ്രതിസന്ധി രൂക്ഷമായി. മുതിര്‍ന്ന ആപ്പ് നേതാവും ഏഴു വകുപ്പുകളുടെ ചുമതലയുള്ള മന്ത്രിയുമായ രാജ്കുമാര്‍ ആനന്ദ് രാജിവച്ചത് മുഖ്യമന്ത്രിയില്ലാത്തതിനാല്‍, ലഫ്. ഗവര്‍ണറെ ഔദ്യോഗികമായി അറിയിക്കാന്‍ പോലുമാകുന്നില്ല. ഇതിനൊപ്പം തീരുമാനങ്ങളെടുക്കാനും നടപടികള്‍ കൈക്കൊള്ളാനും കഴിയാത്തത് ഗുരുതരമായ ഭരണ പ്രതിസന്ധി സൃഷ്ടിക്കുന്നു.
രാജിവയ്‌ക്കുകയോ സ്ഥാനമൊഴിയുകയോ ചെയ്യുന്ന മന്ത്രിമാരുടെ വകുപ്പുകള്‍ മുഖ്യമന്ത്രിയിലാണെത്തുക. എന്നാല്‍, ഇവിടെ മുഖ്യമന്ത്രി തന്നെ ജയിലിലാണ്. അപ്പോള്‍ വകുപ്പുകള്‍ ആര് കൈകാര്യം ചെയ്യുമെന്ന ചോദ്യമുണ്ട്. ഇതോടെ ദല്‍ഹിയിലെ നില പരുങ്ങലിലാകുന്നു. പുതിയ മന്ത്രിയെ നിശ്ചയിക്കാനുമാകുന്നില്ല.
പുതിയൊരു മന്ത്രിയെത്തിയാല്‍ത്തന്നെ അതുമായി ബന്ധപ്പെട്ട ഫയലുകള്‍ ആര് ലഫ്. ഗവര്‍ണര്‍ക്ക് കൈമാറുമെന്നും വ്യക്തതയില്ല. ജയിലില്‍ നിന്നുള്ള ഭരണം അനുവദിക്കില്ലെന്ന് ഗവര്‍ണര്‍ വി.കെ. സക്‌സേന നേരത്തേ തന്നെ പറഞ്ഞിട്ടുണ്ട്.
വിഷയത്തില്‍ ഗവര്‍ണറുടെ നീക്കം നിര്‍ണായകമാണ്. മന്ത്രിമാര്‍ സഹകരിക്കുന്നില്ലെന്ന് ഗവര്‍ണര്‍ കേന്ദ്രത്തെ അറിയിച്ചിരുന്നു. ഇത് ദല്‍ഹി രാഷ്‌ട്രപതി ഭരണത്തിലേക്കെന്ന സൂചനയ്‌ക്കു കരുത്തേകി. സംസ്ഥാനത്തു ഭരണ പ്രതിസന്ധിയെന്ന് ഗവര്‍ണര്‍ റിപ്പോര്‍ട്ട് ചെയ്താല്‍ രാഷ്‌ട്രപതിക്ക് ഇടപെടാം. ഭരണ പ്രതിസന്ധി കനത്തതോടെ കേജ്‌രിവാളിന്റെ രാജി ആവശ്യപ്പെട്ടുള്ള പ്രതിഷേധം ആളിക്കത്തുകയാണ്.
കേജ്‌രിവാള്‍ ജയിലിലായിട്ട് 10 ദിവസമായി. ആപ്പിന് 10 രാജ്യസഭാ എംപിമാരും ലോക്‌സഭയില്‍ ഒരു എംപിയുമുണ്ട്. ഇവരില്‍ ഏഴു പേരും കേജ്‌രിവാളിന്റെ അറസ്റ്റിനെതിരായ പ്രതിഷേധങ്ങളിലൊന്നിലും പങ്കെടുക്കുന്നില്ല. ഇവരുടെ വിട്ടുനില്‍പ്പ് രാഷ്‌ട്രീയ വൃത്തങ്ങളില്‍ വലിയ ചര്‍ച്ചയായി. പാര്‍ട്ടി നേരിടുന്ന പ്രതിസന്ധിയുടെ ആഴം ഇതു വ്യക്തമാക്കുന്നു. പാര്‍ട്ടിയില്‍ രാജിയും മറ്റും നടക്കുന്നതിനിടെയാണ് ഭരണ പ്രതിസന്ധിയും.
