കോട്ടയം: കോട്ടയം വെള്ളൂരില് ട്രെയിന് തട്ടി രണ്ടു കോളേജ് വിദ്യാര്ത്ഥികള് മരിച്ചു. വെള്ളൂര് മൂത്തേടത്ത് മോഹനന്റെ മകന് വൈഷ്ണവ് മോഹനന് (21), ഇടയ്ക്കാട്ടുവയല് കോട്ടപ്പുറം മൂലേടത്ത് വേണുഗോപാലിന്റെ മകന് ജിഷ്ണു വേണുഗോപാല് (21) എന്നിവരാണ് മരിച്ചത്.
കോട്ടയം മംഗളം കോളജിലെ ബിബിഎ വിദ്യാര്ത്ഥികളാണ് മരിച്ചവര്. ബുധനാഴ്ച പുലര്ച്ചെ മൂന്നു മണിയോടെ വെളളൂര് ശ്രാങ്കുഴി ഭാഗത്താണ് അപകടം നടന്നത്. വടയാര് ക്ഷേത്രത്തില് ആറ്റുവേല കണ്ട് മടങ്ങും വഴി എതിരെ ട്രെയിന് വരുന്നത് കണ്ട് തൊട്ടടുത്ത ട്രാക്കിലേക്കു മാറിയപ്പോള് പിന്നില് നിന്നു വന്ന ട്രെയിന് ഇടിക്കുകയായിരുന്നുവെന്ന് പറയുന്നു.
തിരുവനന്തപുരം – മംഗലാപുരം എക്സ്പ്രസാണ് തട്ടിയത്. തലയോലപ്പറമ്പ് പോലീസ് സ്ഥലത്തെത്തി മേല് നടപടികള് സ്വീകരിച്ചു. മൃതദേഹങ്ങള് പോസ്റ്റുമോര്ട്ടത്തിനായി കോട്ടയം മെഡിക്കല് കോളേജിലേക്ക് മാറ്റി. വൈഷ്ണവിന്റെ അമ്മ സിനി, ജിഷ്ണുവിന്റെ അമ്മ ദീപ്തി.
