ന്യൂദൽഹി: ഇന്ത്യാ മഹാറാലി വേദിയുടെ മുന്നിൽ സ്ഥാപിച്ചിരുന്ന അരവിന്ദ് കെജ്രിവാളിന്റെ ചിത്രം കോണ്‍ഗ്രസ് നേതാക്കളുടെ നിര്‍ദേശപ്രകാരം നീക്കം ചെയ്തത് വിവാദമാകുന്നു. വാസ്തവത്തില്‍ ഉള്ളില്‍ അരവിന്ദ് കെജ്രിവാളിന്റെ പതനം കോണ്‍ഗ്രസ് ആഘോഷിക്കുന്നുവെന്നും രഹസ്യസംസാരമുണ്ട്.
കാരണം കോണ്‍ഗ്രസ് ദുര്‍ബലമാകുന്നിടത്തെല്ലാം വളരുന്നത് ആം ആദ്മി പാര്‍ട്ടിയായതിനാല്‍ എങ്ങിനെയെങ്കിലും ഇവരുടെ വളര്‍ച്ച തടയണം എന്നത് കോണ്‍ഗ്രസിന്റെ ആഗ്രഹമാണ്. കാരണം ദല്‍ഹിയില്‍ കോണ്‍ഗ്രസ് നേതാവായിരുന്ന ഷീലാ ദീക്ഷിതിന്റെ നേതൃത്വത്തില്‍ കൈപ്പിടിയില്‍ വെച്ചിരുന്ന ദല്‍ഹിയാണ് പിന്നീട് അരവിന്ദ് കെജ്രിവാളിന്റെ ആം ആദ്മി പിടിച്ചെടുത്തത്. അതുപോലെ കോണ്‍ഗ്രസ് ഭരിച്ചിരുന്ന പഞ്ചാബും കൈവിട്ടുപോയപ്പോള്‍ അത് തട്ടിയെടുത്തത് കെജ്രിവാളിന്റെ പാര്‍ട്ടിയാണ്. കെജ്രിവാള്‍ ദല്‍ഹിയില്‍ മദ്യനയത്തിലൂടെ കോടികള്‍ സമ്പാദിച്ചുവെന്നും ഇത് അന്വേഷിക്കണമെന്നും വാര്‍ത്താസമ്മേളനത്തില്‍ ആദ്യം ആവശ്യപ്പെട്ടത് കോണ്‍ഗ്രസ് നേതാക്കളായിരുന്നു.
രാംലീലാ മൈതാനിയിൽ സ്ഥാപിച്ചിരുന്ന ചിത്രമാണ് സംഘാടകർ നീക്കിയത്. അരവിന്ദ് കെജ്രിവാൾ ജയിലഴികൾക്കുള്ളിൽ നില്‍ക്കുന്ന നിലയിൽ ചിത്രീകരിച്ച പോസ്റ്ററാണ് വേദിക്കു മുമ്പിലായി സ്ഥാപിച്ചിരുന്നത്. വളരെ നേരത്തെ തന്നെ വേദിയിലെത്തിയ കോൺഗ്രസ് നേതാക്കളുടെ തീരുമാനപ്രകാരമാണ് ചിത്രം നീക്കിയതെന്നാണ് വിവരം. ഒരു വ്യക്തിയെ മാത്രം കേന്ദ്രീകരിച്ച് നടത്തുന്ന റാലിയല്ല സംഘടിപ്പിച്ചിട്ടുള്ളത് എന്നാണ് വിശദീകരണം.
ലോക്സഭാ തിര‍ഞ്ഞെടുപ്പിനു മുമ്പായി പ്രതിപക്ഷ ഐക്യം പ്രകടിപ്പിക്കാനായാണ് ന്യുദൽഹിയിൽ മഹാറാലി സംഘടിപ്പിച്ചത്. ലോക്തന്ത്ര് ബചാവോ (ജനാധിപത്യത്തെ രക്ഷിക്കൂ) എന്ന മുദ്രാവാക്യമുയർത്തിയാണ് റാലി.
ഞായറാഴ്ച ഉച്ചയോടെ തുടങ്ങിയ റാലിയിൽ മല്ലികാർജുൻ ഖാർഗെ, അഖിലേഷ് യാദവ്, രാഹുൽ ഗാന്ധി, ശരദ് പവാർ, ഉദ്ധവ് താക്കറെ, തേജസ്വി യാദവ്, ചമ്പായ് സോറൻ, ഫാരൂഖ് അബ്ദുള്ള, മെഹ്ബൂബാ മുഫ്തി, ദെരെക് ഒബ്രയാൻ തുടങ്ങിയ വിവിധ പ്രതിപക്ഷ പാർട്ടികളിലെ പ്രമുഖ നേതാക്കളെല്ലാം പങ്കെടുത്തു. മുഖ്യമന്ത്രി അരവിന്ദ് കെജ്രിവാളിന്റെ സന്ദേശം ഭാര്യ സുനിതയും ഹേമന്ത് സോറന്റെ ഭാര്യ കൽപന സോറനും വേദിയിലെത്തിയിരുന്നു.
