ഹൈദരാബാദ് : വരാനിരിക്കുന്ന ലോക്സഭ തെരഞ്ഞെടുപ്പില് തന്നെ സ്ഥാനാര്ഥിയായി തെരഞ്ഞെടുത്തത്തില് ബിജെപിയോട് നന്ദിയറിച്ച് നടി കങ്കണ റണാവത്ത്.
ബിജെപിക്ക് എന്നും തന്റെ നിരുപാധിക പിന്തുണ ഉണ്ടായിരുന്നെന്ന് കങ്കണ പ്രതികരിച്ചു. ഇന്നലെ ബിജെപിയുടെ അഞ്ചാംഘട്ട സ്ഥാനാര്ഥി പട്ടിക പുറത്തുവിട്ടതിനു പിന്നാലെയാണ് താരത്തിന്റെ പ്രതികരണം. തന്റെ ജന്മസ്ഥലമായ ഹിമാചല് പ്രദേശിലെ മാണ്ഡിയില് നിന്നുമാണ് വരാനിരിക്കുന്ന ലോക്സഭ തെരഞ്ഞെടുപ്പില് ബിജെപി സ്ഥാനാര്ഥിയായി കങ്കണ മത്സരിക്കുന്നത്.
‘എന്റെ പ്രിയപ്പെട്ട ഭാരതത്തിന്റെയും ഭാരതീയ ജനതയുടെയും സ്വന്തം പാര്ട്ടിയായ ബിജെപിക്ക് എന്നും എന്റെ നിരുപാധിക പിന്തുണയുണ്ട്. ബിജെപിയുടെ ദേശീയ നേതൃത്വം എന്നെ ലോക്സഭ സ്ഥാനാര്ഥിയായി പ്രഖ്യാപിച്ചു. ജന്മസ്ഥലമായ ഹിമാചല് പ്രദേശിലെ മാണ്ഡിയയില് നിന്നുമാണ് ലോക്സഭ തെരഞ്ഞെടുപ്പില് മത്സരിക്കുന്നത്. ഇത് സംബന്ധിച്ച ഹൈക്കമാന്ഡിന്റെ തീരുമാനത്തില് ഞാന് ഉറച്ചുനില്ക്കുന്നു’ എന്ന് പറഞ്ഞായിരുന്നു താരം തന്റെ എക്സിലൂടെ പ്രതികരണമറിയിച്ചത്.
രാവിലെ മാണ്ഡിയിലെത്തിയ കങ്കണ ബിജെപി പ്രാദേശിക നേതാക്കളുമായി കൂടിക്കാഴ്ച നടത്തി. ഹോളിയുടെ ഭാഗമായി നേതാക്കൾക്ക് നിറങ്ങൾ കൊണ്ട് തിലകം ചാർത്തിയ കങ്കണ ജയ് ശ്രീറാം വിളികളോടെയാണ് സ്ഥാനാർത്ഥിത്വത്തെ സ്വീകരിച്ചത്. പാർട്ടിക്ക് വേണ്ടിയും മാണ്ഡിയിലെ ജനതയ്ക്ക് വേണ്ടിയും നിലകൊള്ളുമെന്ന് കങ്കണ ഉറപ്പു നൽകി. ഇത് തന്റെ ജന്മഭൂമിയാണ്. ഇവിടെ തിരഞ്ഞെടുക്കപ്പെട്ടാൽ ഞാൻ അവരെ സേവിക്കും. ഇത് തനിക്കും തന്റെ കുടുംബത്തിനും വികാരനിർഭരമായ നിമിഷമാണ്. ഹൃദയം നിറഞ്ഞ നന്ദി രേഖപ്പെടുത്തുന്നുവെന്നും കങ്കണ അറിയിച്ചു.
