പാലക്കാട്: എക്സൈസ് കസ്റ്റഡിയിലെടുത്ത പ്രതിയെ ലോക്കപ്പിനുള്ളില് തൂങ്ങിമരിച്ച നിലയില് കണ്ടെത്തിയ സംഭവത്തില് രണ്ട് എക്സൈസ് ജീവനക്കാരെ സസ്പെന്ഡ് ചെയ്തു. കേസന്വേഷണം ജില്ലാ ക്രൈംബ്രാഞ്ചിന് കൈമാറി. ക്രൈംബ്രാഞ്ച് ഡിവൈഎസ്പിയുടെ നേതൃത്വത്തിലാണ് അന്വേഷണം.
ഇടുക്കി സ്വദേശി ഷോജോ ജോണ് ആണ് എക്സൈസ് കസ്റ്റഡിയില് മരിച്ചത്. രഹസ്യവിവരത്തിന്റെ അടിസ്ഥാനത്തിലാണ് പാലക്കാട് എക്സൈസ് സിഐയുടെ നേതൃത്വത്തിലുള്ള സംഘം കഴിഞ്ഞ ദിവസം വൈകിട്ട് ഷോജോയുടെ കാടാങ്കോട്ടുള്ള വീട്ടിലെത്തിയത്. പരിശോധനയില് വീട്ടില് നിന്ന് രണ്ട് കിലോ ഹാഷിഷ് ഓയില് കണ്ടെടുത്തു. തുടര്ന്ന് കസ്റ്റഡിയിലെടുത്ത ഷോജോയെ ആദ്യം എക്സൈസ് ഓഫീസിലേക്കും പിന്നീട് റേഞ്ച് ഓഫീസിലേക്കും കൊണ്ടുപോയി. രാവിലെ ഏഴ് മണിയോടെയാണ് ലോക്കപ്പില് തൂങ്ങിമരിച്ച നിലയില് കണ്ടെത്തിയത്. അതേസമയം, ഷോജോയുടെ മരണത്തില് ദുരൂഹത ഉണ്ടെന്നാണ് കുടുംബം ആരോപിക്കുന്നത്.
ഷോജോ ആത്മഹത്യ ചെയ്യുന്ന ദൃശ്യങ്ങള് ഓഫീസിലെ സിസിടിവി ക്യാമറയില് പതിഞ്ഞിട്ടുണ്ട്. സംഭവത്തില് രാത്രി ഡ്യൂട്ടിയിലുണ്ടായിരുന്ന രണ്ട് പേര്ക്കെതിരെ വകുപ്പുതല നടപടിയെടുക്കും. ഏകദേശം 25 ലക്ഷം രൂപ മൂല്യമുള്ള ഹാഷിഷ് ഓയിലാണ് ഷോജോയുടെ വീട്ടില് നിന്നും പിടിച്ചെടുത്തത്.
